مرحبا بكم في حلقة جديدة من تعلم العربية براحتك. أنا اسمي عايدة، وإذا هاي أول مرة بتكونوا معي، أنا هون حتى أساعدكم اتحسنوا مهارة الاستماع بالعربية العامية بالمستوى المتوسط. اليوم رح أحكيلكوا عن بلادي الأردن.

 

الأردن موجودة بالشرق الأوسط، وبتجاورها الدول التالية: سوريا، السعودية، فلسطين والعراق. مساحة الأردن حوالي 89342 كم مربع.

 

الأردن دولة غنية بالتاريخ، ولغاية الآن في آثار لعدد كبير من حضارات العالم العظيمة. أراضي الأردن وفلسطين بشبكوا آسيا، أفريقيا وأوروبا. وهيك من بداية الحضارة الإنسانية، الموقع الجغرافي للأردن أعطى دور كبير ومهم من ناحية التجارة والاتصالات، باعتباره بربط بين الشرق والغرب، الشمال والجنوب.

 

ولغاية الآن الأردن بلعب دور مهم لهذا السبب. جلالة الملك عبد الله بن الحسين استلم سلطاته الدستورية كملك للمملكة الأردنية الهاشمية عام 1999 بعدما توفى جلالة الملك الحسين. الأردن بمثل بعض الثقافات القديمة الشرقية.

 

وهذا ببين في بعض المعالم التاريخية الموجودة لغاية الآن مثل مدينة البتراء، اللي بتمثل معلم سياحي مهم للسياح من مختلف أنحاء العالم. بالنسبة للمناخ السائد بالأردن، فهو بيجمع بين المناخين المتوسطي والصحراوي. المتوسطي بسود شمال وغرب البلاد، بينما بقية البلاد بسود فيها المناخ الصحراوي.

 

متوسط درجات الحرارة السنوية بالأردن بتراوح بين 12 ل 25 درجة مئوية. بالصيف ممكن توصل درجة الحرارة 40 درجة مئوية خاصة بالمناطق الصحراوية. عدا عن العصر الصليبي، الأردن ظل تحت الحكم العربي من القرن السابع لغاية بداية القرن السادس عشر.

 

وفي خليط من التقاليد بين سكان الأردن، مثلاً أنك تكون من أصول بدوية، تعتبر مصدر فخر للعديد من الأردنيين. البدو معروفين بأنهم مضيافين جداً، شخصيتهم قوية، وعندهم حس عميق بالروابط العائلية والعشائرية. الأردن دولة صغيرة فيها نقص بمصادر المياه وغيرها من المصادر الطبيعية مثل النفط.

 

بعض المشاكل اللي بواجهها الأردن لغاية الآن هي البطالة، المديونية، والفقر. الحرب اللي قادتها أمريكا في العراق بالـ 2003 أثرت بشكل سلبي على اقتصاد الأردن وخاصة أنه الأردن كان بتمتع بعلاقات تجارية قوية مع العراق ومعتمد على العراق حتى يحصل على أسعار مخفّضة للنفط. وهلأ بدي أحكي عن بعض الحقائق الممتعة عن الأردن.

 

بالأردن في أكتر من مائة ألف موقع سياحي وأثري مثل البتراء والبحر الميت ووادي رم وجرش. وهيك إحنا بنكون ذكرنا طبعاً عدد قليل جداً من المعالم السياحية والأثرية. الأردن غني جداً بالتاريخ والحضارة.

 

والأردن يعتبر مقصد سياحي رائع إذا حابين تقضوا إجازة حلوة وكمان بنفس الوقت تثقفوا أنفسكم عن الإرث الشرق أوسطي. المنسف هو الطبق التقليدي الوطني في الأردن. الطعام يعتبر دايماً من أفضل الطرق اللي منقدر نتعرف فيها على ثقافة بلد معينة وإرثها.

 

المنسف هو طبق بنقدمه مع لحم خروف مطبوخ بالجميد اللي هو نوع من أنواع اللبن وبنقدمه مع رز مرشوش بالصنوبر وأحياناً باللوز. كمان شغلة أكيد كتير منكم بيعرفها هي بأنه البحر الميت هو أخفض بقعة على وجه الأرض. كمية الملوحة بالبحر الميت بتعادل عشر أضعاف الملوحة الموجودة في أي بحر تاني.

 

البحر الميت يقع 420 متر تحت مستوى (سطح) البحر. وبالبحر الميت ممكن لأول مرة بحياتكوا تجربوا تطفوا على المي. وكمان تستفيدوا من القدرات السحرية الشافية للطين اللي موجود بالبحر الميت.

 

هذا الطين مش بس بريّح العضلات لكن كمان بيعطيكم إحساس بالهدوء لأنه فيه مادة البروم اللي هو عبارة عن مادة مهدئة تتبخر من المي وتعتبر نوع من أنواع المهدئات الطبيعية. كمان شغلة لازم تعرفوها عن الأردن إذا انتو بتحبوا المشي هو أنكم ممكن تقطعوا الأردن كلها من الشمال للجنوب في أربعين يوم. درب الأردن طوله أربعمائة واثنين ميل وبياخدكوا أربعين يوم حتى تقطعوه بالكامل.

 

فإذا انتو بتحبوا المشي جربوا هذا الدرب وخلال مشواركم -خلال طريقكم- رح تمروا من أشهر الأماكن المعروفة في الأردن مثل البتراء، وادي رم، وجرش. كمان شغلة ممكن ما بتعرفوها، بالأردن ممكن إذا حد عرض عليكم يعزمكوا على الغداء أو على العشاء ممكن ترفضوا هاي الدعوة لغاية ثلاث مرات لحد ما تقبلوا الدعوة. وهاد جزء من ثقافتنا وبيعطي انطباع بأنه إحنا ما بنحب نتقّل على المضيف فبنرفض مرتين أو ثلاثة لغاية ما نقبل الدعوة.

 

كمان شغلة انتو بجوز صرتوا سامعين عنها هو أنه تم تصوير كتير أفلام مشهورة في الأردن. والسبب هو لأنه فيه عجائب قديمة وفي مناظر خلابة في الأردن بتخلي المصور السينمائي ينجذب لهاي المنطقة. وبعض الأفلام المعروفة اللي تم تصويرها في الأردن هي إنديانا جونز وThe Last Crusade  بتقدروا تشوفوا فيها الخزنة المذهلة للبتراء أو إذا حضرتوا Lawrence of Arabia, The Martian, Red Planet  بتقدروا تشوفوا المناظر المميزة في وادي رم.

 

كمان شغلة حلو تعرفوها عن الأردن هي بأنه عمّان هي من أقدم المدن في العالم. عمان هو عاصمة الأردن طبعاً لكن هاي المدينة كمان موجودة بموقع عين غزال اللي هو يعتبر من أكبر مستوطنات العصر الحجري الحديث في العالم وبرجع تاريخها للعصر الحجري. وكمان التماثيل اللي لاقوها بهذا الموقع تعتبر من أقدم التماثيل في العالم.

 

وبيعود تاريخها لتقريباً 7500 سنة قبل الميلاد. يمكن بعضكم بتساءل عن طريقة اللباس في الأردن كسياح. هلا الأردن يعتبر من الدول الليبرالية في الشرق الأوسط من ناحية اللباس لكن مع هيك الأردن دولة إسلامية وفيها مشاعر ثقافية حساسة.

 

يعني يفضّل أنكم تلبسوا لبس لائق حتى تظهروا الاحترام للثقافة الأردنية. وخاصة إذا زرتوا الأماكن الدينية ممكن في بعض الأحيان يمنعوكوا أنكم تدخلوا إذا مش لابسين بشكل لائق. بهاي الأماكن يفضل أنه النساء يلبسوا لبس طويل فضفاض بيغطي إيديهم ورجليهم. وكمان الرجال بهاي الأماكن يفضل أنهم يلبسوا بنطلون.

 

 وهيك بكون وصلت لنهاية هاي الحلقة من تعلم العربية براحتك للمستوى المتوسط. بشكركم لاستماعكم.

 

وإذا حبيتوا هاي الحلقة ممكن كمان تعجبكم حلقة تانية بعنوان حقائق مثيرة للاهتمام عن الثقافة العربية. إذا حبيتوا هاي الحلقة اشتركوا بهذا البودكاست حتى ما تفوتكم أي حلقات قادمة. وإذا بتستمعوا لنفس الحلقة أكثر من مرة هذا الإشي بساعدكم أنكم تتذكروا وتحفظوا المصطلحات الجديدة اللي تعلمتوها.

 

شكراً كمان مرة وإلى اللقاء.

 

(Transcribed by TurboScribe.ai)