مرحبا، أنا عايدة مع حلقة جديدة من تعلم العربية براحتك للمستوى قبل المتوسط. بهاي السلسلة، رح أحكي بسرعة أبطأ من العادي حتى أسهل عليك فهم المحتوى. اليوم رح أحكي عن الأحلام، والأسئلة اللي رح أحاول أجاوب عليها هي شو هي الأحلام؟ ليش إحنا بنحلم؟ وشو الأنواع المختلفة من الأحلام؟

 الأحلام هي عبارة عن سلسلة من الصور، المشاعر، والأفعال اللي بتم أثناء نومنا.

 

الخبراء بيحكوا بإنه إحنا بنحلم من ثلاث مرات لست مرات كل ليلة، وبإنه كل حلم بيستمر بين خمس دقايق لعشرين دقيقة. خمسة وتسعين بالمية من أحلامنا بننساها أول ما نقوم الصبح. إلا إذا حاول الإنسان بشكل واعي أنه يتذكر أحلامه أول ما يفيق من النوم.

 

بعض الناس بيحلموا بالألوان، بس فيه ناس بيحلموا بالأبيض والأسود. على الرغم من إنه عالم الأعصاب سيجموند فرويد جذب الاهتمام لأهمية الأحلام بالقرن التاسع عشر، لهلأ ما في توافق على سبب الأحلام، شو اللي بيخلينا نحلم؟ بعض النظريات هي: إحنا منحلم لأنه لما بنكون نايمين، بنكون عم بنحاول نستوعب المعلومات اللي بنتلقاها كل يوم، فبنقدر نعتبر بأنه الحلم هو طريقتنا بأنه نقوي ذاكرتنا وقدراتنا على التعلم، وحتى أنه نقدر نستوعب كل إشي صار حوالينا. والأحلام ممكن تكون طريقتنا للتعبير عن أمنياتنا ورغباتنا الغير واعية.

 

فيه كمان احتمالية وهي بأنه الأحلام ببتشتغل كنوع من أنواع العلاج النفسي. الأحلام بتشمل تجاربنا الحالية ومحاولتنا بأنه نعالج الماضي، وكمان محاولتنا اللاواعية بأنه نحضر نفسنا للمستقبل. كل المعلومات اللي عندنا اياها حول الأحلام لساتها محصورة، وفي كتير أسئلة لساتها مفتوحة.

 

هادا لأنه الأحلام صعب ندرسها في مختبر. والتطورات في التكنولوجيا ووسائل البحث الجديدة ممكن تحسن فهمنا للأحلام بالمستقبل. في أنواع مختلفة من الأحلام. الأحلام الجليلة هي أحلام بكون فيها الإنسان واعي بأنه عم بيحلم، وممكن يحاول أنه يتحكم ببعض نواحي الحلم.

 

حوالي 55% من البالغين مروا بهاي التجربة -اللي هي الحلم الجليل- على الأقل مرة وحدة بحياتهم. بعض الدراسات بتحكي بأنه الأحلام الجليلة ممكن تأثر بشكل سلبي على صحتنا النفسية أو العقلية لأنه بتزعج نومنا والناس اللي عم بيحلموا ممكن يتخربطوا أو يتشوشوا وما يقدروا يستوعبوا وين الخيال ووين الواقع. وهلأ رح أحكي عن الأحلام الحيوية.

 

في كتير ناس ما بتذكروا أحلامهم أو بتذكروهم بصعوبة لما يصحوا. لكن أحيانا ممكن نستيقظ ونلاقي ذكريات واضحة عن أحلامنا أو نتذكر أحلامنا بوضوح. محتوى الحلم الحيوي ممكن يسبب أحاسيس سعيدة أو مريحة وحتى في بعض الأحيان ممكن نستيقظ ونتمنى لو نقدر نرجع للحلم.

 

أما الأحلام المتكررة فهي عبارة عن تكرار لنفس الصور في أكتر من حلم وبأكتر من ليلة. علماء النفس ما بتفقوا إذا كانت الأحلام بتحمل معنى. بعض علماء النفس بيحكوا بإنه الأحلام بتساعد بإنه نفهم نفسية الشخص أو حياته اليومية.

 

بينما غيرهم بيحكوا بإنه الأحلام ما (فش) فيها تناسق، فبالتالي صعب إنه يكون إلها أي معنى. وهلأ دوركم: حاولوا بكم جملة بسيطة إنكم تحكوا: أكم مرة بتفكروا بإنكم بتحلموا؟ هل بتتذكروا أحلامكم وبإيش بتحلموا عادة؟

 

 وهلأ خلوني أعطيكم مثال شو ممكن الناس يحكوا إذا بدهم يجاوبوا على أسئلة مرتبطة بالأحلام.

 

(أنا بتذكر بإني قرأت إنه كل الناس بيحلموا كل ليلة لكن عادة ما بتذكر أحلامي لما بصحى. على الأغلب الناس بيحلموا بشغلات كويسة إذا كانوا مبسوطين ومتفائلين لكن أحياناً ممكن يحلموا إشي سيء إذا كانوا متوترين أو بواجهوا ضغوطات في حياتهم. ما بظن إنه أحلامنا ممكن تفسيرها بشكل دقيق لأنه حتى العلماء بيعترفوا بإنه في أكتر من سبب ليش إحنا منحلم.

 

وأظن بإنه إذا كان عنا كتير أحلام سيئة على الأغلب لازم نحاول نلاقي حل للمشكلة اللي عم بتسببلنا توتر بحياتنا. على الأغلب الأحلام هي عبارة عن محاولة غير واعية إنه نحاول نفهم الماضي وكمان نفهم تجاربنا الحالية. )

 

وهيك إحنا بنكون وصلنا لنهاية هاي الحلقة.

 

بتمنى إنكم لقيتوها مفيدة وإذا حبيتوها، اتذكروا بإنكم تشتركوا بهذا البودكاست. انبسطت بوجودكم معي وياريت لو تكونوا معي بالحلقات الجاية. أنا عايدة من تعلم العربية براحتك.

 

إلى اللقاء.

 

(Transcribed by TurboScribe.ai)