مرحبا بكم في حلقة جديدة من تعلم العربية براحتك للمستوى قبل المتوسط. أنا اسمي عايدة وعم بعمل هذا البودكاست حتى أساعدكم اتحسنوا مهارة الاستماع والمحادثة بالعربية العامية. وبهاي السلسلة، الموجهة للمستوى قبل المتوسط، بحكي عن موضوع مختلف في كل مرة بحيث يكون الموضوع مناسب لهذا المستوى وطبعا بسرعة أبطأ من العادي حتى أسهل عليكم فهم المحتوى.

 

والهدف هو أني أزودكم بالمفردات اللازمة في مجال واسع من المواضيع مثل العيلة (العائلة)، الهوايات، الدراسة، السفر وغيرها. اليوم رح أحكي عن موضوع مهم بالعالم العربي، اللي هو العيلة والأصدقاء. العيلة بتلعب دور مهم بالعالم أو بالمجتمع العربي.

 

وإحنا بنعتبر أنه أفراد العيلة همه أقرب الناس علينا. ولما نحكي عن العيلة، إحنا ما عم نتحدث بس عن أقرب الأشخاص علينا بالعيلة مثل الأم أو الأب أو الإخوة. عم نحكي كمان عن أفراد العيلة الممتدة مثل العمات والخالات، العمام والاخوال وكمان ولاد العم والخال.

 

في كتير من العائلات، أفراد العائلة الممتدة بيلعبوا دور في تنشئة الأولاد وتربيتهم وتعليمهم. والأجداد في كتير من الأحيان بساعدوا في تنشئة الأحفاد. الأيام هاي في كتير من الأمهات بيختاروا أنهم يشتغلوا برا البيت حتى يساندوا ازواجهم بسبب الظروف الاقتصادية الصعبة.

 

فإذا الأجداد ما عندهم مشكلة، حيتركوا ولادهم معاهم بدل ما يسجلوهم بحضانات. المشاركة بالمناسبات العائلية مثل الاحتفالات أو بالمناسبات الحزينة مثل وفاة فرد من أفراد العائلة، بنعتبرها واجب. ولما نشارك بهاي المناسبات، إحنا بنكون بنفرجي احترامنا لبعض وتعاطفنا مع بعض.

 

بس الأمور العائلية ما بتقتصر على أنه نكون متواجدين بالمناسبات الخاصة، (لكن) بتشمل كمان الزيارات الدائمة لعائلتنا ولنسايبنا. أفراد العائلة بيبذلوا أقصى طاقتهم حتى يساعدوا بعض لما يواجهوا صعوبات. الإخوان اللي أكبر ممكن يساعدوا اللي أصغر منهم مادياً لحد ما يخلصوا دراستهم.

 

والإخوان اللي أصغر لازم يبينوا احترامهم لاخوانهم اللي أكبر ويساعدوهم بإنجاز المهمات. الأصدقاء كمان بيحملوا وزن بالثقافة العربية، وفي صحاب بيكونوا قراب لإلنا لدرجة أنه بتصير تحسهم جزء من العائلة. ومش غريب بهذا الجزء من العالم أنك تعتبر أولاد العم أو الخال من أقرب أصدقائك.

 

وإذا صار في مشكلة بين صديقين، في كتير من الأحيان بحاولوا أفراد العيلة أو غيرهم من الأصحاب أنهم يحلوا المشكلة. وفي مجتمعاتنا، أفراد العيلة والأصحاب بيلعبوا دور مهم بأنهم يساعدونا إنه نلاقي وظائف عن طريق العلاقات الممتدة. وهلأ خليني أعطيكم مثال، إيش ممكن نحكي إذا بدنا نجاوب على أسئلة مرتبطة بالعيلة والأصدقاء.

 

( إحنا عيلتنا بتتكون من خمس أفراد، عندي أخ واحد وأخت.عندي كتير خالات وعمة، بس ما عندي غير خالين وعم واحد. جدادي من طرف أمي لساتهم موجودين معانا، بس جدادي من طرف والدي توفوا. عندي كتير أولاد إخوال وأعمام، بس معظمهم عايشين برا البلاد.

 

أمي وأبوي وأختي بيدعموني كتير، ووجودهم في حياتي مهم كتير بالنسبة إلي. وبعتبر حالي محظوظة كتير لأنه كان عندي ولا يزال عندي أصدقاء قراب علي كتير. أنا بثق بأصدقائي وبستمتع بإني أقضي وقت معاهم.

 

ومن أجمل ذكرياتي هي ذكريات الطفولة اللي انبسطت فيها كتير مع قرايبي وأصدقائي).

 

 وهلأ حاولوا إنكم تجاوبوا على الأسئلة هاي باللغة العربية العامية. شو حجم عائلتك؟ بتقضي وقت كتير معاهم؟

 

وهيك إحنا بنكون وصلنا نهاية هاي الحلقة. بتمنى إنكم تكونوا استمتعتوا. وإذا حبيتوا هاي الحلقة، اتذكروا بإنه الاستماع لنفس الحلقة أكتر من مرة بساعدكم كتير بإنكم تتذكروا المفردات الجديدة اللي تعلمتوها. انبسطت كتير بوجودكم معاي، وياريت لو تتركولي لايك وتكونوا معي بالحلقات القادمة.

 

أنا عايدة من تعلم العربية براحتك. إلى اللقاء!

 

(Transcribed by TurboScribe.ai)