مرحبا، أنا عايدة مع حلقة جديدة من تعلم العربية براحتك للمستوى قبل المتوسط. بهاي السلسلة، رح أحكي عن موضوع مختلف في كل مرة بحيث يتناسب الموضوع مع هذا المستوى وطبعاً بسرعة أبطأ من العادي حتى أسهل عليكم فهم المحتوى. هذا البودكاست مش للمبتدئين فتأكدوا إنكم بالمستوى قبل المتوسط على الأقل حتى تقدروا تفهموا المحتوى.

 

اليوم رح أحكي عن الغذاء أو الطعام. الغذاء هو الإشي اللي الناس والحيوانات بياكلوه حتى يعيشوا. كل كائن حي بحتاج للطاقة حتى يستمر بالحياة.

 

الطعام بنحصل عليه من الحيوانات والنبتات (النباتات). والمخلوقات الحية بتاكل هذا الطعام حتى تحصل على الطاقة والتغذية. الطعام بيحتوي على التغذية أو المكملات الغذائية اللي الناس والحيوانات بيحتاجوها عشان تظل صحتهم كويسة.

 

تناول الطعام هو نشاط بيستمتعوا فيه معظم الناس. الطعام بيحتوي على البروتينات، الدهون، الكربوهيدرات، الفيتامينات، المي (الماء) والمعادن. والسوائل اللي بنستعملها للطاقة وحتى نحصل على التغذية بنسميها مشروبات.

 

الطعام مهم للحياة: حتى نظل بصحة كويسة ونشيطين، لازم نحصل على كمية كافية من الطعام. بس الأطعمة اللي بنتناولها كمان لازم تكون آمنة وغنية بكل المكملات الغذائية اللي جسمنا بيحتاجها. لازم نختار من مجال واسع من الأطعمة أو الأغذية ولازم نتناول الطعام بشكل منتظم خلال النهار.

 

طبعاً مهم إنه نستمتع بالطعام اللي احنا بنتناوله. لازم يكون شكله ورائحته وطعمه كويس. من غير التغذية المناسبة، الأطفال والشباب ما بيقدروا يطوروا إمكانياتهم والبالغين راح يلاقوا صعوبة إنهم ينجزوا الأمور اللي لازم ينجزوها.

 

الطعام بزود أجسامنا بكل ما يحتاج إليه. إنه نظل عايشين، نشيطين، إنه نقدر نتحرك ونشتغل. الطعام كمان بساعدنا بإنه جسمنا يصنع خلايا جديدة وأنسجة، بنحتاج إلها للنمو. بنحتاج كمان للطعام حتى تظل صحتنا كويسة وحتى جسمنا يقدر يعالج نفسه. وكمان بنحتاج للطعام حتى نمنع ونحارب الإلتهابات.

 

الطعام المناسب للناس بيحتوي على مصادر نباتية وحيوانية. لكن في بعض الناس بيرفضوا إنه يتناولوا الطعام من مصدر حيواني مثل اللحوم، البيض والمنتجات اللي مصدرها من الحليب أو اللي بتحتوي على الحليب. الشخص اللي ما بتناول اللحوم بنسميه باللغة العربية نباتي.

 

الطعام اللي بينتجوه المزارعين ممكن التعديل عليه عن طريق عمليات صناعية أو معالجة الطعام. والطعام المعالج عادة بيحتوي على عدة مكونات طبيعية بالإضافة لإضافات أو مكملات غذائية. الخبز مثلا يعتبر طعام مصنّع.

 

معظم الناس ما بينتجوا الطعام اللي همّه بتناولوه. الناس بيشتروا معظم طعامهم بالمحلات أو الأسواق. بس كمان بعض الناس لغاية الآن بيتناولوا معظم أو بعض الطعام اللي همّه بينتجوه بأنفسهم.

 

وممكن الناس يشتروا الطعام وياخدوه على البيت حتى يطبخوه. أو يشتروا هذا الطعام الجاهز للأكل من كشك أو من مطعم. نقص الطعام شكل مشكلة كبيرة عبر الأزمان.

 

في كثير ناس ما عندهم فلوس كافية بتمكنهم (من) إنهم يشتروا الطعام اللي بيحتاجوه. الطقس السيء أو مشاكل تانية مثل الحروب أحياناً ممكن تدمر المحاصيل الزراعية في جزء معين من العالم. إذا الناس ما بتناولوا طعام كافي لفترة طويلة من الزمن فهذا الاشي بأدّي للمرض وممكن كمان يأدي إلى الوفاة.

 

بالمناطق اللي فيها كثير ناس ما عندهم أكل كافي بنطلق على هاي المشكلة اسم مجاعة. الطعام والماء إذا كانوا ملوثين ممكن يؤدوا لانتشار الأمراض. أو ممكن بعض الناس كمان يعانوا من اضطرابات في الأكل، بتأدي لأنه يتناولوا كمية كبيرة من الطعام أو تمنعهم من إنهم يقدروا ياكلوا بعض الشغلات أو الكميات اللي همه بيحتاجوها. ومن هاي الأمراض أو اللي أكتر شيوعاً هي حساسية الأطعمة، اللي بتأدي لآثار سلبية في بعض الناس لما يتناولوا أطعمة معينة تعتبر بالنسبة لغيرهم من الناس إشي طبيعي وآمن.

 

إذا تناولوا الناس كمية زايدة من الطعام -زيادة عن اللزوم -هذا بأدي للبدانة، وبالتالي بأدي لمشاكل صحية عديدة. من ناحية تانية تناول كمية قليلة من الطعام أكثر من اللازم بأدي لمرض فقدان الشهية اللي نتيجته طبعاً سوء التغذية.

 

وعشان هيك الناس لازم يكون عندهم توازن في تناول كميات كافية ومناسبة من الطعام وكمان نوعية الطعام لازم تكون صحية. في كتير ثقافات أو أديان عندهم محظورات بتتعلق بالأغذية. يعني في قواعد معينة بتحكي للناس إيش الإشي اللي ما بصير يأكلوه أو بتتعلق بكيفية تحضير الطعام.

 

مثال على هاي القوانين الدينية الإسلام اللي بيحظر أو بيحرّم تناول لحم الخنزير وبالهندوسية تناول لحم البقر غير مسموح. وهيك بنكون وصلنا نهاية حلقتنا اليوم من تعلم العربية براحتك. بتمنى تكونوا لقيتوا هاي الحلقة مفيدة.

 

إذا حبيتوها، تذكروا بأنه الاستماع لنفس الحلقة أكتر من مرة بساعدكم إنكم تتذكروا المفردات الجديدة اللي تعلمتوها. وياريت لو تشتركوا بهذا البودكاست. انبسطت كثير بوجودكم معي.

 

وبتمنى تكونوا معي بالحلقات القادمة. أنا عايدة من تعلم العربية براحتك. إلى اللقاء!

 

(Transcribed by TurboScribe.ai)