مرحبا بكم في بودكاست تعلم العربية براحتك. أنا اسمي عايدة وعم بعمل هذا البودكاست لإلكم حتى أساعدكم (إنكم) تستمعوا لمواد أصلية باللغة العربية العامية. إذا كان مستواكو هو قبل المتوسط، اللي هو A2 حسب النظام الأوروبي، أنتو بالمكان الصح حتى انكم تحسنوا مهارات الاستماع والمحادثة بالعربية العامية.

 

بهاي السلسلة رح تستمعوا لموضوع مختلف في كل مرة. والهدف منها هو تزويدكم بالمفردات اللازمة بمجال واسع من المواضيع، مثل الرياضة، الهوايات، التسوق، الطعام أو الأكل، السفر وغيرها من المواضيع. اليوم رح نحكي عن الهوايات.

 

والأسئلة اللي رح أناقشها هي: ليش الناس بحتاجوا هوايات؟ شو أكتر الهوايات المحبوبة أو المعروفة؟ هل كل الناس عندهم هواية؟ الهوايات هي نشاطات إحنا بنحب نعملها بوقت الفراغ تبعنا. الهواية هي إشي بنختار إنو نعمله ومش بنضطر نعمله. ولازم يكون إشي ممتع ومسلّي.

 

يمكن الهواية اللي بنختارها مرتبطة بمواهبنا أو بجوز بقدراتنا الفنية والجسدية. الناس الرياضيين عادة بختاروا هواية في مجال الرياضة، مثل كرة القدم، كرة السلة، السباحة أو الجمباز. وغيرهم من الناس اللي بجوز مش كثير رياضيين بس بحبوا الموسيقى، ممكن يتعلموا كيف يعزفوا على آلة موسيقية.

 

من أكتر الآلات الموسيقية اللي بحبوا الناس يتعلموها، الجيتار، البيانو، الكمان، والطبلات. الناس اللي بحبوا يرسموا عادة بطوروا مهارات الرسم بمراحل مختلفة من حياتهم. الرسم (هو) يعتبر نشاط مريح جداً وفعال بأنه يخفف من التوتر.

 

وغيرهم من الناس بيعتبروا بأنه تعلم اللغات هو هواية. بقضوا معظم وقت فراغهم وهم بحاولوا يحسنوا من مهارات الاستماع والمحادثة باللغات اللي بيعرفوها، أو بضلوا مستمرين بتعلم لغات جديدة. بالدول المتقدمة، الهوايات شائعة أكتر من الدول النامية أو الفقيرة. لأنه الناس بوظائفها بتكون رواتبهم أعلى بالدول المتقدمة، فبقدروا يشتغلوا ساعات أقل ويكون عندهم وقت فراغ أكبر. وكمان في هوايات بتكلف فلوس كثير، خاصة إذا اضطرينا ناخد دورات حتى إنه نحسن مهاراتنا بهاي الهوايات. وفي في بعض الثقافات اللي الروابط الأسرية فيها قوية كثير، كثير من وقت الفراغ بنقضيه مع العائلة حتى نساعد بعضنا أو نستمتع مع بعضنا.

 

والهوايات بهاي الدول أو بهاي الثقافات بكون إلها أهمية أقل. بشكل عام، ممتع وإشي إيجابي إنه يكون عندنا هواية. أولاً لأنه لما يكون عندنا هوايات ما بنزهق بسرعة وبنبلش نفكر زيادة عن اللزوم- اللي ممكن يؤدي للحزن أو الفراغ.

 

وتانياً لأنه لما يكون عندنا هوايات بنبلش نتعلم شغلات جديدة. وتعلم الشغلات الجديدة هي لازم تكون عملية تستمر أثناء حياتنا وحتى لما نكبر بالعمر. وهلأ خلوني أعطيكم مثال إيش ممكن الناس يجاوبوا لما ينسئلوا أسئلة مرتبطة بالهوايات:

 

(أنا عندي أكتر من هواية، بس هوايتي المفضلة هي تعلم اللغات.لأنه هو عبارة عن إشي بلشته وأنا طفلة. تعلم لغة جديدة بالمدرسة بحطك بالمسار الصح حتى إنك تسير تحكي أكتر من لغة. ولما تيجي من أكتر من ثقافة فهذا الإشي كمان بساعدك إنك تتعلم اللغات بشكل أسرع وأسهل.

 

وإذا كنت تقدر تتواصل مع الناس بأكتر من لغة فهذا الإشي بسمحلك بإنك تحكي مع ناس من ثقافات وخلفيات مختلفة. وأنا بلاقي هذا الإشي ممتع كتير. كمان بستمتع بالقراءة.

 

بحس إنه القراءة بتنقلنا لعالم تاني بنقدر نشوف فيها العالم من جوانب مختلفة. بنقدر نتعلم كتير من القراءة عن تجارب الناس التانيين. وهي كمان وسيلة ممتازة إنه الواحد يحسن المفردات والتهجئة.

 

القراءة برضو طريقة كتير كويسة إنه نتخلص من بعض التوتر لأنه بيعطينا فرصة إنه نهرب من المشاكل أو الصعوبات اللي ممكن عم بنواجهها. الاستماع للموسيقى والرقص كمان بديل كويس كتير للرياضة إذا كنت إنت شخص مش رياضي. وكمان ممتع كتير ومسلي إنك ترقص مع الناس التانيين اللي بيعشقوا الموسيقى.

 

لأنه الموسيقى هو الإشي اللي بخلي أي حفلة ممتعة أكتر ومسلية أكتر. أنا شخصياً بفضل إني أتعلم اللغات الصبح بينما بفضل إني أقرأ المساء. طبعاً أسهل إنك تمارس هواياتك لما تكون أصغر بالعمر وما عندك مسؤوليات عائلية.

 

لما يكون عندك أطفال بتصير تعطي أولوية لأمور تانية بالحياة. وبعض الناس اللي عندهم أطفال ممكن يتخلوا عن هواياتهم تماماً بهاي المرحلة من حياتهم لكن بيرجعولها بوقت متأخر بحياتهم. )

 

وهيك إحنا بنكون وصلنا نهاية حلقتنا لليوم من تعلم العربية براحتك وموضوعنا اليوم كان عن الهوايات.

 

بتمنى إنكم تكونوا تعلمتوا بعض المصطلحات الجديدة والمفردات الجديدة. ما تنسوا إنه تتركولي لايك وتشتركوا بهذا البودكاست. وحتى تتعلموا اللغة العربية بشكل أسرع حاولوا إنكم تستمعوا لنفس الحلقة مرتين أو ثلاثة لأنه هذا الإشي بساعدكم إنكم تتعودوا على تركيبة الجمل العربية وتتذكروا المفردات الجديدة.

 

شكراً كثير لاستماعكم حاولوا إنكم تكونوا معي بالحلقات الجاية وإلى اللقاء.

 

(Transcribed by TurboScribe.ai)