مرحبا بكم في حلقة جديدة من تعلم العربية براحتك. أنا اسمي عايدة وعم بعمل هذا البودكاست حتى أساعدكم تستمعوا لنصوص أصلية باللغة العربية العامية. فإذا انتو كنتوا بالمستوى قبل المتوسط، اللي هو A2، هذا هو المكان الصح حتى تحسنوا مهارة الاستماع والمحادثة بالعربية العامية.

 

بهاي الحلقة، رح تستمعوا لموضوع مختلف في كل مرة. والهدف أني أزودكم بالمفردات اللازمة بمجال واسع من المواضيع، مثل العائلة، الهوايات، الدراسة، السفر وغيرها من المواضيع. واليوم رح أحكي عن السكن والإقامة والأماكن المختلفة للسكن.

 

معظم الناس بعيشوا بشقق أو ببيوت خاصة بنسميها فلل. تقريباً الكل بفضل أنه يعيش بفيلا. فكرة الفلل بتشدنا لأنه من ناحية بكون عنا مساحة أوسع وحديقة ومن ناحية تانية بكون عنا خصوصية أكتر بكتير.

 

ما بكون في إزعاج من الجيران وكمان بنقدر نعمل حفلاتنا ونعزم صاحباتنا وصحابنا من دون ما نزعج غيرنا. ممكن الواحد يمتلك شقة أو يستأجرها. الأيام هاي ممكن يكون الإشي هذا مكلف كتير ومش الكل بقدر يشتري شقة.

 

بالأردن معظم الطلاب بضلهم عايشين مع أهلهم. وحتى لما يبلشوا شغل، الذكور والإناث غالباً بضلهم عايشين مع أهلهم. السبب الرئيسي هو مادي لأنه الطلاب غالبهم ما بقدروا يستأجروا شقة.

 

وكمان لأنه الثقافة العربية مبنية على العلاقات العائلية القوية. وبما أنه معظم الشباب ما بعيشوا لحالهم بشقة بالأردن، كمان صعب أنه الواحد يلاقي شقة مصممة لشخص أو لشخصين بس.

 

الناس بعيشوا إما في المدينة أو في الريف. في كتير ناس بالأردن نقلوا من المحافظات للعاصمة عمان لأنه البنية التحتية أفضل وعشان الخدمات وفرص العمل. مثل أي بلد ثانية في مزايا وفي سلبيات لما نعيش بالريف.

 

طبعا بالريف أهدى (أهدأ)،  بتقدروا تستمتعوا بمشوار طويل في الطبيعة. الأطفال عندهم مساحة أوسع للعب. وطبعا البيئة أنظف.

 

بعض السلبيات هي أنه الواحد ما بلاقي كتير نشاطات ثقافية. ما في حياة ليلية. وفي خصوصية أقل بالريف.

 

وكمان إذا الواحد ما لقى وظيفة بالريف، على الأغلب رح يضطر أنه يمشي بالسيارة على الأقل ساعة حتى يوصل وظيفته كل يوم. وطبعا بهاي الحالة الواحد بكون عنده وقت فراغ أقل. وهلأ خلوني أعطيكم مثال إيش ممكن الواحد يحكي لما يجاوب على أسئلة مرتبطة بالسكان وظروف الإقامة.

 

(أنا شخصيا بفضل أني أعيش بالمدينة. بحب (أني) أروح على الريف عشان التنزه وعشان المشاوير الطويلة. بس كمان بالنسبة إلي بعتبره هادي كتير أني أعيش هناك. بفضّل أني ما أحس حالي معزولة. وكمان ما بحب أسوق لمسافات طويلة. فبالنسبة إلي بعتبر أنه الحياة بالمدينة أنسب بالنسبة للشغل.

 

أحيانا بحب (أني) أروح على نشاطات ثقافية. وبالمدينة ممكن الواحد يزور متحف، يروح على السينما، أو يروح على حفلة موسيقية. بعمان معظم المحلات بتظل فاتحة لليل أو للمسا.

 

فبالتالي ممكن الواحد بسهولة يلاقي كتير مطاعم مفتوحة بهاي الأوقات. الريف مكان جميل كتير بيقدر الواحد يروح عليه عشان يتخلص من التوتر أو الضغط النفسي ويلاقي بيئة أهدى شوي. بس أنا ما بفضل أني أعيش هناك.

 

بحب أني أكون قريبة من العيلة ومن الأصدقاء. وكمان بفضل أنه يكون في خدمات مهمة قريبة مني مثل المحلات، الدكاكين، المطاعم، المستشفيات والمؤسسات التعليمية. وهلأ حاولوا أنكم تجاوبوا على هاي الأسئلة بالعربية العامية.

 

شو شكل البيت اللي انت بتفضل تعيش فيه؟ وهل بتفضل تعيش بالريف أو بالمدينة؟ وليش؟

وهيك إحنا بنكون وصلنا نهاية هاي الحلقة. بتمنى انكم تكونوا استفدتوا. وإذا حبيتوا هاي الحلقة، اتذكروا بأنه الاستماع لنفس الحلقة أكتر من مرة مفيد حتى تتذكروا المفردات الجديدة اللي تعلمتوها.

 

انبسطت كتير بوجودكم معي، وياريت لو تتركولي لايك وتشتركوا بهذا البودكاست حتى تحضروا أو تستمعوا للحلقات الجاية. أنا عايدة من تعلم العربية براحتك. إلى اللقاء.

 

 

(Transcribed by TurboScribe.ai)