مرحبا بكم في حلقة جديدة من تعلم العربية براحتك للمستوى قبل المتوسط. بهاي السلسلة رح أحكي عن مواضيع مختلفة بحيث تتناسب هاي المواضيع مع هذا المستوى، وطبعاً بسرعة أبطأ من العادي حتى أسهل عليكم فهم المحتوى. عنوان حلقتنا لليوم هو كيف ممكن نكوّن صداقات؟ وهل الثقافة بتأثر على طريقة تكويننا لهاي الصداقات؟

الدراسات بتحكي بأنه الناس اللي عندهم أصدقاء صحتهم أحسن وبعيشوا لفترة أطول من الناس الوحيدين.

 

خلونا نطلّع على بعض الأسباب اللي بتخلّي الناس يحسوا بأنهم بحاجة للأصدقاء. الإنسان بشكل عام كائن اجتماعي بستمتع بالتواصل مع غيره حتى أنه يقدر يشارك مشاعره، أفكاره، وهمومه. بنحب نشارك اللحظات السعيدة مع غيرنا لأنه بنحس إنه إذا احتفظنا فيها لأنفسنا ما رح يكون الها مغزى كبير وبتفقد من متعتها.

 

بنحتاج لأصدقائنا باللحظات الحزينة لأنهم بواسونا وبأكدولنا بأنه الأيام الجاية رح تكون أفضل. بيعرفونا منيح، فعادة بيحكوا الشغلات المناسبة واللي بترفع معنوياتنا. الأصدقاء الحقيقيين كمان بساعدوا بعض عند الحاجة.

                                                                                                                   

ممكن يساعدوا بعض في أمور صغيرة مثل الدراسة، أو حتى بالقرارات المهمة اللي ممكن تأثر على مستقبلنا. والناس بختلفوا بالسرعة اللي ممكن يكونوا فيها صداقات، وعدد الأصدقاء اللي بحتاجولهم وكمان مين اللي ممكن أسميه صديق. هذا كله بيعتمد على شخصيتنا، بس كمان بيعتمد على الثقافة اللي إحنا عايشين فيها.

 

بالدول العربية نوعاً ما سهل إنك تكوّن صداقات بسبب الطبيعة الودية -بشكل عام- للعرب وكمان فضولهم بإنهم يتعرفوا على ثقافات تانية. ببعض الثقافات الغربية ممكن يكون أصعب شوي إنه نكون صداقات لأنه بياخدوا وقت أكتر حتى يتعودوا على الناس الجداد ويسموهم (حتى) أصدقاء. وكمان بميزوا أكتر بين المعارف والأصدقاء وبيسموا أصدقاؤهم بس الناس اللي بكونوا قراب عليهم كتير واللي على الأغلب بيطلعوا معهم كتير أو باستمرار.

 

خلونا نطلع على بعض الطرق اللي ممكن نكوّن فيها صداقات. بالمدرسة بكون عنا أصدقاء مقرّبين ممكن يضلوا معنا طول عمرنا. لما بننتقل للجامعة بنتعرف على ناس كتير جداد وبعض هدول الناس بنكون معهم صداقات قريبة.

 

وبعدين لما ننتقل عالشغل كمان بنتعرف على ناس جداد. وأكيد كمان بهالمرحلة على الأغلب رح نكوّن صداقات جديدة. لكن بمرحلة الشغل بصير أصعب علينا شوي بأنه نحتفظ بهاي الصداقات لأنه في كتير ناس بتجوّزوا وبكونوا عائلة جديدة بهاي المرحلة.

 

طبعاً الأصدقاء الجداد ممكن كمان نلاقيهم عن طريق النشاطات المختلفة. الرياضة مثلا ممكن تلم الناس عبعضهم حسب النشاط المشترك بينهم. في بعض البلدان مثل ألمانيا، الانضمام لنادي يعتبر من أكتر الطرق اللي ممكن نتعرف فيها على ناس جداد ونكون صداقات جديدة.

 

تعلم لغات جديدة كمان طريقة ممتازة حتى نكون صداقات لأنه ممكن تحضروا دورات بمركز لغات أو تشتركوا بنادي للتحدث بهاي اللغة- اللي مش بس بتقدروا تتدربوا فيها على اللغة الجديدة، كمان بكون في فرصة تتعرفوا على ناس جداد ببيئة مريحة. وهلأ خلوني أعطيكم مثالين شو ممكن الناس يحكوا بموضوع الصداقة.

 

 الشخص الأول:

 

 أصحابي كتير مهمين بالنسبة إلي. عندي خمس أصحاب بعتبرهم قراب علي وكلهم صارلهم عشر سنين صحابي. بعرف واحد منهم ١٧ سنة. قضيت معاهم أجمل الأوقات وبقدر صداقتهم كتير.

 

أحسن إشي بأصحابي هو إنه بقدر بأي وقت أحكي معاهم، أدردش معاهم، أو نطلع سوا لما أحس بالوحدة أو إني زهقان. وكمان ممكن أحكيلهم أي إشي وبعرف إنه أسراري محفوظة عندهم.

 

 الشخص الثاني ممكن يحكي:

 

 كتير بحب أتعرف على ناس جداد وأكون صداقات جديدة وخاصة من ثقافات مختلفة لأنه هيك بقدر أتعلم شغلات جديدة عن الثقافات الثانية وأمارس اللغات اللي بعرفها.

 

بحب يكون عندي دائرة كبيرة من الأصدقاء حتى أستمتع معاهم بنشاطات مختلفة. مثلاً عندي صحاب بحبوا الرياضة فبلعب معاهم تنس أو بسبح معاهم. وفي الي صحاب بحبوا يسافروا ويشوفوا بلدان جديدة فبسافر معاهم تقريبا كل سنة.

بنتعرف على المعالم الرئيسية بهاي البلدان وبنتعرف على العقلية اللي بتسود بهاي البلدان. ما بآمن بفكرة الصحاب اللي كتير مقرّبين. بفضل يكون عندي عدد كبير من الأصدقاء لأنه هيك بقدر أبادل أفكاري مع عدد كبير من الناس ودائماً بلاقي حدا أطلع معه.

 

وهيك بنكون وصلنا لنهاية هاي الحلقة من تعلم العربية براحتك. إذا استمتعتوا بهاي الحلقة لا تنسوا تشتركوا بهذا البودكاست وتذكروا إنه الاستماع لنفس الحلقة أكتر من مرة بساعدكم تتذكروا المفردات الجديدة اللي تعلمتوها. بشكركم على استماعكم.

 

ويا ريت لو تكونوا معي بالحلقات الجاية. أنا عايدة من تعلم العربية براحتك. إلى اللقاء.

 

(Transcribed by TurboScribe.ai)