مرحبا، أنا اسمي عايدة وهاي حلقة جديدة من تعلم العربية براحتك. إذا هاي أول مرة بتستمعوا لهذا البودكاست، أنا هون حتى أساعدكم اتحسنوا من مهارة الاستماع للعربية العامية بالمستوى المتوسط. بكل الحلقات بستعمل تشكيلة كبيرة من المفردات حسب الموضوع اللي عم بحكي عنه.

 

بعض المواضيع رح تكون معقدة أكتر من غيرها. فبنصحكم بالأول تستمعوا للحلقات أو المواضيع اللي أنتوا بتحسوا بأنكم حتفهموها بشكل أسهل. يعني ممكن تكون مواضيع سمعتوا عرب غيري بيحكوا فيها مثلا.  ممكن تكونوا أنتو ناقشتوها بالجامعة إذا عم بتتعلموا العربية بالجامعة. أو استمعتوا لهذا الموضوع ببودكاست تاني. طيب خلينا نبلش بموضوعنا لليوم اللي هو حقائق مثيرة للاهتمام بالثقافة العربية.

 

بداية خليني أعمل مقدمة صغيرة. العالم العربي بيشمل 22 دولة وعدد السكان فيه أكتر من 200 مليون نسمة (mistake: It's actually more than 400 million). لفظ عربي هو لفظ بنستعمله حتى نوصف الأشخاص اللي لغة الأم تاعتهم هي اللغة العربية.

 

كلمة عربي هي لفظ ثقافي ومش لفظ عرقي. والعرب في الهم خلفيات عرقية ودينية مختلفة. هلأ الـ 22 دولة عربية هم الجزائر البحرين جزر القمر جيبوتي مصر العراق الأردن لبنان الكويت ليبيا المغرب موريتانيا عمان فلسطين قطر السعودية الصومال السودان سوريا تونس والإمارات العربية المتحدة واليمن.

 

هلأ خلينا ندخل بالموضوع المثير للاهتمام ورح أبلش بشغلة بتمنى إنو معظمكم تعرفوها. النقطة الأولى هي إنو مش كل العرب مسلمين. يعني بتوقع لإنو معظم الشخصيات اللي إنتو بتسمعوا عنها بالغرب ممكن يكونوا مسلمين فبتوقع سهل عليكوا تفترضوا بإنو كل العرب مسلمين.

 

وعلى ما يبدو في جزء من العالم الغربي بيخربط بين المفردات مسلم وعربي وبيعتبروا بإنو إلهم نفس المعنى وهذا الكلام خطأ. صحيح إنو الغالبية العظمى من العرب مسلمين لكن كمان بتلاقوا الديانة المسيحية، اليهودية وغيرها من المعتقدات ضمن الثقافة العربية.

 النقطة الثانية هي الشرف.  الشرف اشيء كتير مهم بالعالم العربي. يعني العرب بيعتبروا إنو الشرف والإحترام كتير موضوع خطير وأبدا مش لازم تمزحوا فيه. وما بيصير تتمسخروا على العرب وأكيد ما بيصير تتمسخروا على الكبار بالعمر. الروابط الأسرية أو العائلية واحترام كبار السن هو إشي العالم العربي بيحترمه كتير وهي عوامل أساسية في الثقافة العربية وأبدا مش لازم نستهتر فيها.

تاني شغلة العلاقات أهم من الشغل. إذا سافرتوا على أي جزء من العالم العربي للشغل لازم تعرفوا بأنو ما في إشي اسمه يلا نبلش بالشغل على طول بالثقافة العربية.

 

أول اجتماع اجتماعين لازم نستعملهم عشان نحدد أو نقرر إذا العلاقة حتمشي ولا، لا رح تكون صحية، رح نقدر نطورها ولا لا بين الأطراف المختلفة وبعد هيك ممكن نبلش بالنقاشات اللي عن جد. فبالتالي خدوا وقتكم حتى تتعرفوا على الناس اللي بدكم تشتغلوا معاهم وما تحسوا حالكم مضغوطين بالوقت أو إنو لازم تبلشوا على طول بالشغل.

 

النقطة الرابعة العرب بيحبوا المجوهرات أو خلينا نحكي العربيات بيحبوا المجوهرات. والعربيات بيحبوا يتأنقوا ويشخصوا ويلبسوا مجوهرات تقريبا بكل مناسبة. النقطة الخامسة لغة الجسد. لغة الجسد مهمة بكل ثقافات العالم أو البلدان تقريبا وإلها معنى معين. بالثقافة العربية برضو مهمة كتير وهذا الاشي بيخلي أنواع التحيات المختلفة يمكن صعبة عليكم بالأول. بالنسبة للتحية بالإيد بتمدوا إيدكم اليمين وبتمسكوا إيد الشخص الثاني ما بتشدوا عليها كتير بس بجوز لمدة أطول من الأجانب شوي. أما الأصدقاء أو الزملاء من نفس الجنس فممكن يعبطوا بعض. يمكن يبوسوا على الخدين- طبعا أكيد بس إذا كانوا من نفس الجنس. أما إذا حييتوا الطرف الثاني أو الجنس الآخر بهذه الطريقة فمش بس حتزعلوا. ممكن تسببوا مشكلة كبيرة- حسب طبعا بأنو منطقة بالعالم العربي بتكونوا.

 

النقطة السادسة الشاي والقهوة مهمين. طبعا الأكل والشرب هي محاور مهمة أو رئيسية تقريبا بكل ثقافات بالعالم. والثقافة العربية ما بتختلف.

 

بالعالم العربي الشاي بلعب دور كبير بالمجتمع وبالضيافة، إذا بدك تفرجي الضيف حسن ضيافتك أو حتى كجزء من الاجتماعات الرسمية. القهوة كمان كتير مهمة وبتنشرب تقريبا بعد كل وجبة. بس القهوة عادة بتضيّف بنهاية الزيارة، مش ببدايتها.

النقطة السابعة الوقت مش أهم إشي بالعالم. بالثقافة الأجنبية أو الغربية خلينا نحكي نمط الحياة سريع. وإحنا عندنا بالعالم العربي مش هيك. يعني مثلا بأمريكا أو ببريطانيا ممكن تكونوا متعودين تظلوا تطلعوا على الساعة وتستعجلوا من مكان لمكان. بس إذا حاولتوا تعملوا هيك بالعالم العربي الطرف التاني ممكن يحس بالإهانة.

 

لأنه إذا ضليتوا تطلعوا على الساعة عندنا بالعالم العربي فهذا الإشي بخلي الضيف أو المضيف يحس بأنك مشغول كتير ومش فاضيلهم ومعتبر أنه وقتك أهم منهم. فبالتالي حطوا هالساعة عجنب وحاولوا أنكم تتفادوا هاي العادة.

النقطة التامنة: الثقافة العربية بنقدر نقسمها لثلاث أجزاء: المدنية، الريفية، والبدوية. وهذا الإشي طبعا بعني بأنه يا جماعة مش كل العرب بيركبوا جمال! في عنا وسائل نقل تانية.وكمان مش كلهم بيعيشوا بالخيم.

 النقطة اللي بعدها الأكل العربي من أزكى أنواع الأكل اللي ممكن تلاقوه بالعالم. العرب بيحبوا أكلهم.

 

ومعهم حق بصراحة لأنه معظم أكلهم زاكي كتير وبشهّي. ولدرجة أنه كتير من هاي الوجبات صارت موجودة بالثقافة الغربية، مثل الشاورما، الكباب، والفلافل.

 

النقطة اللي بعدها العرب كتير بيحبوا يحتفلوا. الاحتفالات مثل الأعراس والتخريج ممكن أحيانا تستمر لأيام بالعالم العربي. فإذا أنتو عمركم ما شفتوا شو هو العرس العربي، لازم تحطوه على قائمة الأمور اللي بدكم تعملوها المرة الجاي لما تزوروا بلد عربي.

 

وجهزوا حالكم بأنكم تحتفلوا كتير. النقطة اللي بعدها الثقافة العربية هي ثقافة عريقة، قديمة. لكن نسبة الشباب بالمجتمعات العربية عالية كتير. يعني نعتبر مجتمعات فتية. يعني العرب اللي أعمارهم بين 15 سنة و 29 سنة بيشكلوا حوالي 32% من عدد السكان بالعالم العربي. وهيك إحنا بيكون عنا أصغر ديمغرافية بالعالم كله.

 

النقطة اللي بعدها بالعالم العربي إحنا ما بنحب نحكي لأ بطريقة مباشرة. بنفضل إنو نحكي إن شاء الله. وبنعتبرها طريقة ألطف شوي من إنو نرفض الشغلة بطريقة مباشرة.

 

وهيك إحنا بنكون وصلنا نهاية حلقتنا لليوم من تعلم العربية براحتك. حكينا فيها عن بعض الأمور اللطيفة عن الثقافة العربية أو بعض الحقائق المثيرة للاهتمام. بشكركم كتير على استماعكم.

 

ما تنسوا تتركولي لايك وتشتركوا بهذا البودكاست حتى ما تفوتكم أي حلقات قادمة. وحاولوا إنكم تستمعوا لكل حلقة أكتر من مرة حتى تقدروا تتعلموا وتتذكروا الكلمات الجديدة بشكل أفضل. شكرا كتير وإلى اللقاء.

 

(Transcribed by TurboScribe.ai)