مرحبا بكم في حلقة جديدة من تعلم العربية براحتك. أنا اسمي عايدة وأنا هون حتى أساعدكم اتحسنوا مهارة الاستماع والمحادثة باللغة العربية العامية. هذا البودكاست مش للمبتدئين فقبل ما تستمعوا اتأكدوا انكم على الأقل بالمستوى قبل المتوسط

 حسب النظام الأوروبي.A2اللي هو

رح تتعلموا كتير مصطلحات جديدة وإذا انتو أصلاً بالمستوى المتوسط فهاي بتظلها وسيلة ممتازة انكم اتظلوا تمارسوا اللغة وما تنسوا المفردات اللي انتو صرتوا متعلمينها بالإضافة لمفردات كتيرة جديدة حول مواضيع مختلفة. اليوم رح نحكي عن الكذب. هذا عنوان حلقتنا لليوم رح أشرحلكوا ليش الناس بيكذبوا، كيف احنا بنعلم أولادنا الكذب، والانهاع المختلفة من الكذبات.

 

معظمنا ما بيحب يختلط مع الناس اللي بيكذبوا لكن بالحقيقة كلنا بنكذب من وقت لآخر. الكذبات إلها انهاع وأشكال مختلفة. ممكن نترك بعض التفاصيل واحنا بنحكي، وممكن نكذب كذبة كاملة

 

بغض النظر قديش احنا بنكذب، لساتنا أكيد بنعتبر انه هذا تصرف خاطئ. ولما الناس بكذبوا علينا، كثير من المرات هذا بيكسر الثقة بين الأشخاص، وبيسبب مشاكل بالعلاقات. لكن ممكن إذا تعرفنا على الأسباب، ممكن هذا يساعدنا بانه نفهم الأشخاص اللي بيكذبوا

 

خلينا أول إشي نتطلع على نوعين رئيسيين من انهاع الكذبات. من ناحية في عنا الكذبات اللي بيسموها العلماء كذبات اجتماعية. بهاي الحالة احنا بنكذب لصالح غيرنا

 

بينما من ناحية تانية في عنا كذبات مش اجتماعية (غير اجتماعية)، وهاي الكذبات بنحكيها لصالحنا الخاص. الكذبات الاجتماعية بتكون مدفوعة بمشاعر قوية من التعاطف والرحمة للآخرين. معظم العلماء بيعتقدوا بانه احنا بنتعلم كيف نكذب حتى نحمي غيرنا أو نرفع معنوياتهم

 

وبانه كل هاي العملية بتبلش بين الأعمار 7 سنين ل11 سنة. بهذا العمر المبكر بنبلش نعتبر بانه الكذبات الاجتماعية مبررة. الكذبات الاجتماعية هي جزء من التكتيكات الاجتماعية اللي احنا بنتعلمها واحنا عم نكبر

 

يعني تدريجياً بنتعلم بانه إذا حكينا الصراحة بكل الظروف، ممكن الناس يعتبرونا وقحين أوبنفتقد اللباقة. مثلاً إذا حدا أعطانا هدية ما عجبتنا، على الأغلب ما رح نحكي أنا بالمرة مش عاجبتني هاي الهدية أو هاي الهدية بشعة. ليش؟ لانه واحنا عم نكبر راقبنا الكبار وهم بتصنّعوا الحماس على شغلات ما بيحبوها

 

فمنلقط منهم هاي الحركات، الإبتسامات المزيفة وغيرها من التلميحات المش مباشرة. بس كمان بنفهم بانه الكبار عم بكذبوا عشان يحموا الشخص الثاني، مثلاً اللي أعطاهم الهدية، من إنه يتأذى. الكذبات الاجتماعية بتتطلّب منا انه نتعرف على المعاناة بالشخص الآخر، يعني انه يكون عندنا تعاطف

 

وانه يكون عندنا رغبة بانه نخفف هاي المعاناة، إلي هي الرحمة. وبناءً على هذا التصرف، الأبحاث الحديثة بتزعم بإنه الكذب ممكن يعكس الصفات الحميدة في الناس. أما الكذب غير الاجتماعي، فهو بيبين بكير شوي بالأطفال، أبكر من الكذبات الاجتماعية، لأن فكرتها أو مفهوم الكذب غير الاجتماعي كتير أبسط

 

وهو بيعتمد بالأساس على الإدراك بانه الكبار ما بقدروا يقرؤوا أفكارنا.بنتعلم بسرعة بإنه ممكن نتلاعب على الناس، سواء عملنا هيك أو لا، بيعتمد على طبيعة الشخص اللي أنا حاب أكونه بالمستقبل. الحقيقة هي بانه معظم الناس بيكذبوا حتى يخلوا غيرهم يعملوا الإشي اللي بدهم إياه

 

أما اللي بيكذبوا عشان يتلاعبوا بموقف معين أو بالناس الثانيين، فهم على الأغلب مهتمين بس بالمكسب الشخصي، وبيفشلوا بإنهم يتعاطفوا مع مشاعر الناس الثانية. لما يكذبوا أو بتركوا بعض التفاصيل وما بذكروها، ممكن يحققوا هدف شخصي. لما نوصل عمر سبع سنين تقريبا، أو الأطفال بس يوصلوا سبع سنين، باستمرار حنلاقيهم بفضلوا إنهم يكونوا لطيفين من إنهم يكونوا صريحين، وهذا بعكس المنطق الأخلاقي والعاطفي المعقد بشكل متزايد فينا

 

بالحقيقة، معظمنا نعتبر بأن الكذبات الإجتماعية هي قرار أخلاقي. في سلسلة من الدراسات قاموا فيها بين 2014 و2015، بيّنت بأن الكذبات السوداء تؤذي الثقة بين الناس، والكذبات السوداء كمان بتأثر سلبياً على الشبكات الإجتماعية. بينما الكذبات البيضاء كان لها تأثير معاكس تماماً، بحيث إنها بتقوي العلاقات الإجتماعية

 

ووجدت العديد من الدراسات بأن الناس ممكن حتى يسامحوا الكذبات البيضاء وحتى ممكن يقدروها بالنهاية. وهاي الفروقات بتبين بالتخطيط الدماغي. الطريقة اللي بتأثر فيها الكذبات المختلفة على الدماغ ممكن تأثر على تصرف الإنسان على المدى البعيد

 

وفيه ببعض التجارب اللي أجريت على فئة معينة من الناس كانوا عارفين فيها بأنهم ممكن يحصلوا على جائزة مالية إذا كذبوا على حساب غيرهم، أثبتت بأنه هاي الفئة من الناس بلشوا يكذبوا كذبات صغيرة، بس كل ما استمرت التجارب بلشوا يكذبوا أكتر وأكتر. ولما عملوا تخطيط دماغي للمشاركين، وجدوا بأن النشاط بالمنطقة بالدماغ اللي اسمها اللوزة الدماغية كانت تقل مع كل كذبة جديدة. الجدال لصالح الكذبات الاجتماعية هو نفس الجدال ضد الكذبات السوداء

 

معيارنا ودليلنا بهاي الكذبات لازم يكون التعاطف واللطف تجاه الآخرين. تمام، حكينا هلأ شو الانواع الرئيسية من الكذب؟ الكذبات الاجتماعية والغير اجتماعية. خلينا نتطلع على بعض الأسباب اللي بتخلي الناس يكذبوا

 

السبب الأول حماية الذات. في كتير ناس بيكذبوا لأنه بدهم يحموا أنفسهم من موقف مش مريح. الأطفال والكبار بيكذبوا حتى يتأكدوا أو يضمنوا بأنهم ما رح يوقعوا بمشاكل أو حتى يتفادوا العقاب

 

وفي كتير ناس بيكذبوا لأنهم بيكونوا عارفين أنهم عملوا شغلة ممكن تزعل الطرف الثاني. ممكن بهاي الحالة ما نكون عملنا إشي غلط بس بدناش نبرر تصرفاتنا. السبب الثاني حكينا عنه اللي هي الكذبات البيضاء

 

منكذب واحنا بنحاول ندافع عن غيرنا أو بنحاول أنه نجنبهم الأذى النفسي. السبب الثالث هو عشان نحمي مشاعرنا احنا أو نحمي تقديرنا لذاتنا. يعني خلينا نفترض أنه في وحدة قدمت عوظيفة وما حصلت عليها

 

ممكن تحكي أنا أصلاً ما كنت بدي هاي الوظيفة. بس الحقيقة أنه كانت بدها إياها فهي بهاي الحالة عم بتكذب حتى تحمي نفسها من خيبة الأمل. السبب الرابع حتى نحتفظ بسر

 

ممكن نكون بدنا نفاجئ حدا ونشتريلهم هدية مش متوقعة. أو ممكن يكون عيد ميلاد شخص وبدنا نعمللهم عيد ميلاد مفاجئ. ما بدنا نخرب هاي المفاجأة فبالتالي إذا شك الطرف الثاني- صاحب العيد- شك بإنه احنا عم نعمل إشي ممكن على الأغلب نكذب على هذا الشخص

 

السبب الخامس هو إنه احنا حابين الناس يحبونا. كلنا منحب نكون محبوبين وكتير إشي مهم إنه ننتمي لمجموعة معينة. فبالتالي في كتير ناس بيكذبوا حتى يتم تقبلهم من الآخرين

 

يعني ممكن شخص يتظاهر بإنه مهتم بشغلة معينة أو يتفق مع جملة انحكت مع إنه هو فعليا عنده معتقدات تانية. طبعا هاي بس بعض أسباب الكذب. في عندنا مثلا كمان الكذب المرضي بس ما رح أحكي عنه عشان ما أطول عليكم

 

وبنهاية الحلقة حابة بس أسألكوا هالسؤال. كل قديش بتكذبوا؟ وهل دايماً كذباتكم كذبات اجتماعية؟ حاولوا إنكم تجاوبوا على هدول السؤالين باللغة العربية. بتمنى إنكم تكونوا اتعلمتوا كتير مفردات جديدة

 

وهيك بنكون وصلنا نهاية حلقتنا لليوم من تعلم العربية براحتك. ويا ريت لو تكونوا معي بالحلقات الجاية. إلى اللقاء

 

.