مرحبا بكم! أنا عايدة مع حلقة جديدة من تعلم العربية براحتك للمستوى قبل المتوسط. بهاي السلسلة رح أحكي عن موضوع مختلف في كل مرة بحيث يتناسب الموضوع مع هذا المستوى.

 

وطبعا رح أحكي بسرعة أبطأ من العادي حتى أسهل عليكم فهم المحتوى. الهدف هو أني أزودكم بالمفردات اللازمة بمجال واسع من المواضيع مثل العائلة، الهوايات، السفر، والدراسة، وغيرها من المواضيع. اليوم رح أحكي عن وسائل الإعلام.

 

وسائل الإعلام هي المصادر اللي إحنا بنستعملها حتى نحصل على معلومات وعلى الأخبار. وسائل الإعلام تغيرت كتير بآخر 30 سنة. بهديك الأيام الناس كانوا يعتمدوا بشكل أساسي على الراديو، التلفزيون، الجرائد والمجلات حتى يحصلوا على معلومات ويعرفوا إيش اللي عم بصير بالعالم.

 

وكمان عدد القنوات بهديك الأيام كانت كتير محصورة أكتر من هلأ. الأيام هاي الجيل الشاب بعتمد تقريباً بشكل حصري على وسائل الإعلام الاجتماعية، السوشال ميديا، حتى يحصل على معلومات وكمان حتى يتواصل مع الأصدقاء والعيلة. الجيل اللي أكبر عمراً بيستعملوا كمان السوشال ميديا لكن أقل بكتير.

 

عادة بفضلوا التواصل المباشر مع الناس لأنه هيك همه نشأوا كأطفال وكمراهقين. السوشال ميديا الها محاسن ومساوئ. صار السوشال ميديا لا يمكن الاستغناء عنه كوسيلة للتواصل مع العيلة والأصدقاء اللي عايشين بالغربة.

 

هاي الوسيلة تعتبر أسرع وأكثر الطرق عملية حتى نظل على تواصل مع حبايبنا اللي عايشين بالغربة. وكمان صار أي حدا يقدر ينزل فيديو إله طابع سياسي أو اجتماعي ممكن وسائل الإعلام أو قنوات الإعلام الرئيسية أو العادية تقرر إنها تحجبها. وطبعاً صار أصعب على القنوات الرسمية إنها توقف نشر الأخبار اللي هي مش حابة إنها توصل العالم.

 

لكن السوشال ميديا كمان تم انتقاده لأنه الجيل الشاب بستعمل هاي المنصات بشكل مبالغ فيه. وفي بعض الحالات بتتحول حتى لإدمان. في كتير مراهقين صار عندهم هوس بهذا النوع من التواصل لدرجة إنهم بطلوا حتى يتحركوا وبطلوا نشيطين مثل ما لازم.

 

وهذا طبعاً بأدي لمشاكل صحية ومشاكل بالنوم. وكمان من المساوئ للتواصل الاجتماعي عن طريق السوشال ميديا هو إنه صار أسهل على الناس إنهم ينشروا أخبار كاذبة. في كتير ناس بصدقوا الأخبار اللي بلاقوها على السوشال ميديا من غير ما يدركوا إنها مفبركة.

 

وهلأ خلوني أعطيكم مثال إيش ممكن الناس يحكوا لما يجاوبوا على أسئلة مرتبطة بالإعلام: (أنا بستعمل وسائل الإعلام التقليدية والسوشال ميديا. بس بشوف بأنه ما في مصدر أخبار حيادي بالكامل. فكل قناة بتحاول إنها تنقل الأخبار بطريقة بتناسب وجهتها السياسية إلى حد ما.

 

وحتى نقدر نكوّن نظرة متوازنة للأخبار، لازم نتابع أكتر من مصدر للأخبار حتى نشوف كيف بتم تغطية الخبر من زوايا مختلفة. والسوشال ميديا ممكن تكون مفيدة كتير من ناحية التواصل مع الأشخاص. لكن أنا شخصيا ضد نشر محتوى شخصي وكمان ضد نشر عدد كبير من الصور.

 

لأنه على كتير من منصات السوشال ميديا ما بنقدر نحذف المحتوى الشخصي بعد ما يتم نشره. وأتوقع إنه في ناس بندموا إنهم نشروا بعض المعلومات أو الصور الشخصية اللي نشروها قبل كذا سنة. كمان الجيل الشاب مش لازم يخسر الاتصال المباشر مع الناس لأنه هذا النوع من التواصل بساعدنا حتى نفهم الآخرين بشكل أفضل عن طريق لغات الجسد.

 

وبرأيي الناس أفضل إنهم يقضوا وقت أقل على السوشال ميديا لأنه في كتير من الحالات هذا بأدي لقلة النشاط وتضييع الوقت. وأتوقع كمان إنه في ناس بندموا بنهاية النهار إنهم قضوا وقت كتير على السوشال ميديا. )

 

وهيك بنكون وصلنا نهاية حلقتنا لليوم.

 

بتمنى إنكم لقيتوها مفيدة وإذا حبيتوها اتذكروا إنه الاستماع لنفس الحلقة أكتر من مرة بساعدكم إنكم تتذكروا المفردات الجديدة اللي تعلمتوها. انبسطت بوجودكم معي وإذا حبيتوا هاي الحلقة يا ريت لو تشتركوا بهذا البودكاست وتكونوا معي بالحلقات الجاية. أنا عايدة من تعلم العربية براحتك.

 

إلى اللقاء!

 

(Transcribed by TurboScribe.ai)