مرحبا بكم في حلقة جديدة من تعلم العربية براحتك. أنا اسمي عايدة وقررت أني أعمل هذا البودكاست حتى أساعدكم تستمعوا لمواد أصلية باللغة العربية العامية. فإذا أنتو كنتوا بالمستوى قبل المتوسط، هادا هو المكان الصح لإلكم إنكم تحسنوا مهارة الاستماع والمحادثة باللغة العربية.

 

بهاي السلسلة اللي موجهة لهذا المستوى قبل المتوسط اللي بنسميه A2 حسب النظام الأوروبي، رح تستمعوا لموضوع مختلف في كل مرة. والهدف أني أزودكم بالمفردات اللازمة بمجال واسع من المواضيع مثل العائلة، الهوايات، الدراسة، السفر وغيرها من المواضيع. واليوم رح أحكي عن الفلوس.

 

الأسئلة اللي رح أطرحها هي: شو إدراك الناس للفلوس؟ شو نظرتهم للفلوس؟ ليش مهم أنه نوفر فلوس؟ هل كل الناس قادرين إنهم يوفروا؟ وهل الفلوس بتساوي السعادة؟ الفلوس إشي كلنا بنحتاجه حتى أنه نعيش حياة محترمة. بعض الناس بدهم يعملوا فلوس بسرعة وكمية كبيرة من الفلوس ويصيروا أغنياء حتى ما يضطروا يقلقوا بالفلوس بحياتهم. وغيرهم ما بمانعوا إنهم يعيشوا حياة عادية متوسطة طالما أنه كل الأمور الأساسية متوفرة بحياتهم مثل الطعام، اللبس، بيت مريح ووسيلة نقل.

 

الفلوس ما بنقدر نستغني عنها إذا بنا نعيش حياة مريحة. لكن في بعض الناس بصير هدف عندهم أنهم يطلعوا فلوس قد ما بيقدروا. حابين يشتروا ماركات غالية ويكون عندهم فيلا بأكتر من بلد.

 

وفي كمان ناس ببلشوا يتنافسوا مع غيرهم من العائلات الغنية وبصير هوس عندهم أنه يكون عندهم أغلى السيارات وأغلى الملابس والإكسسورات. في ناس شاطرين كثير بتوفير الفلوس وبإدارتها كمان. عمرهم ما بضطروا يطلبوا مساعدة من غيرهم.

 

ما بكونوا أغنياء بس دائماً بتمكنوا من أنهم يشتروا كل إشي بحتاجوه لعيلتهم وبيوتهم. وفيه غيرهم بلاقوه كثير صعب أنهم يديروا الفلوس. وبصرفوا أكتر من المبلغ اللي موجود عندهم- اللي متوفر عندهم.

 

هدول الناس كثير مرات بكون عندهم مشاكل، وحتى ممكن بالأخير يصفّوا فقراء. بكونوا عارفين -مدركين- أنه مش لازم يصرفوا هلقد فلوس، بس ما بيعرفوا كيف يبطلوا يصرفوا كتير. طبعاً مهم أنه نوفر فلوس لأنه أحياناً رح نحتاج مبالغ أكبر من العادي حتى نصرفها على أمور مثل رسوم الدراسة، مشاكل صحية أو مثلاً رسوم المستشفى.

 

يعني الفلوس مهمة عشان نعيش حياة مريحة بس الفلوس ما بتساوي السعادة. في كتير ناس أغنياء مش مبسوطين وفي كتير ناس مش أغنياء مبسوطين. احتمال أنه هاي الفئة الأخيرة بيقدّروا نواحي تانية من الحياة مثل الصحة، العائلة، الأصدقاء ووظيفة ممتعة.

 

وهلأ خليني (خلوني) أعطيكم مثال إيش ممكن الواحد يحكي لما يجاوب على أسئلة مرتبطة بالفلوس.

 

(الفلوس مهمة بس مش أهم إشي بالحياة. إذا عندك فلوس كتير بس عندك مشاكل صحية ما إلها حل، ما رح تقدر تستمتع بالفلوس الموجودة عندك. طبعاً إنه نضطر نقلق بالفلوس طول الوقت كمان ما بتأدي لحياة ممتعة وممكن تسبب مشاكل عائلية كتيرة.

 

عشان هيك أنا برأيي إنه كلنا لازم نحاول نعمل فلوس حتى نعيش حياة مريحة، بس مش لازم نحول فكرة الفلوس لهوس. إذا بدنا نعيش حياة مريحة، لازم نوفر شوية فلوس كل شهر حتى نتفادى المشاكل المالية. وكمان أنا برأيي الفلوس مهمة مش بس عشان نعيش حياة مريحة، بس عشان نقدر كمان نأمن الشغلات بالحياة اللي بتخلينا أسعد، مثل السفر وممارسة هواياتنا.

 

السفر أحياناً بكون مكلف، بس الأيام هاي صار أسهل علينا نلاقي عروض كويسة للتذاكر وللإقامة على النت. لو إني غنية، كان قدرت أصرف فلوس أكتر على قضايا خيرية. في كتير ناس عندهم حظ أقل منا، ومش الكل صحتله فرصة إنه يحققوا الإشي اللي بدهم ياه بحياتهم عشان ظروف ما قدروا همه يتحكموا فيها.

 

إذا كان عندنا فلوس كفاية، لازم نحاول نساعد غيرنا اللي بكافحوا بحياتهم حتى يطعموا ولادهم، يعلموهم، أو يدفعوا فواتير صحية. وكمان إذا إنتو كنتوا من الأشخاص اللي بتغلّبوا ليحطوا شوية فلوس على جنب، حاولوا تتذكروا بإنه إنتو بجوز ما بتحتاجوا كل إشي بتشتروه. أحياناً بنشتري شغلات بنقدر نستغني عنها.

 

فإذا إحنا قدرنا إنه نستغني عن بعض الأمور اللي ما بنحتاجها بكل شهر ووفرنا الفلوس اللي كان صرفناها، بالأخير بنتمكن بإنه نشتري الأشياء اللي ممكن فعلياً نحتاجها. وهذا كان مثال عن الشغلات اللي ممكن نحكيها عن موضوع الفلوس. بتمنى إنه تكونوا لقيتوا هاي الحلقة مفيدة، وإذا حبيتوها، اتذكروا بإنه الاستماع لنفس الحلقة أكتر من مرة بساعدكم كتير إنكم تتذكروا المفردات الجديدة اللي تعلمتوها.

 

انبسطت كتير بوجودكم معي، وياريت لو تتركولي لايك وتشتركوا بهذا البودكاست حتى ما تروح عليكم الحلقات الجاية. أنا اسمي عايدة من تعلم العربية براحتك. شكراً الكم وإلى اللقاء!

 

(Transcribed by TurboScribe.ai )