مرحبا بكم في حلقتنا لليوم من تعلم

العربيه براحتك انا اسمي عايدة وانا هون حتى اساعدكم تحسنوا مهاراتكم باللغه

العربيه العامية. هذا البودكاست مش للمبتدئين فقبل

ما تستمعوا تأكدوا انكم في المستوى قبل المتوسط على الاقل. رح تتعلموا مصطلحات

جديده كثيره واذا انتو أصلاً بالمستوى المتوسط بتضلها هاي طريقه ممتازة حتى

تتأكدوا انكم تضلوا تمارسوا اللغه وما تنسوا المفردات اللي صرتوا متعلمينها وكمان

رح تكتسبوا مفردات كثيرة جديدة بمواضيع مختلفة. بما انه معظمنا بنحب نكون ناجحين

بحياتنا اليوم حابه احكيلكم عن بعض أسرار الناس الناجحين في

حياتهم. النقطه الأولى هي بانه الناس الناجحين ما بيهتموا كثير برأي الناس اللي

حواليهم فيهم. بيعرفوا انفسهم كثير منيح وبفهموا بانه مش كل الناس حواليهم ايجابيين

.وراح يضلوا يحكوا شغلات ايجابيه عنهم عندهم قيم قويه وثابته وبيعرفوا ايش الاشي

المهم بالنسبه لهم في الحياة. كمان عندهم أهداف واضحة وبياخدوا خطوات محدده حتى

يحققوا هاي الاهداف. لكن بنفس الوقت هم بيعرفوا بانه النجاح ما بنقدر نحققه بين

يوم وليله، فبالتالي عندهم أطر زمنيه واضحه بتساعدهم بانهم

يتقدموا خطوه خطوه للأمام . هلأ انهم مش كثير بيهتموا الناس شو

بيحكوا عنهم او شو رأيهم فيهم مش معناته بانهم مغرورين او بانهم ما يستمعوا لرأي

الناس حواليهم، لكن هم بياخذوا الملاحظات اللي بشوفوا بانها ممكن تساعدهم يتقدموا

للأمام ،يعني التعليقات او الملاحظات الايجابيه، وبقرروا انه يتجاهلوا غيرها من

الملاحظات وهذا بدوره بياخدنا للنقطه الثانيه: الناس الناجحين بتقبلوا النقد

الايجابي لانه الناس الناجحه او الناجحين بحبوا يضلهم يتعلموا يعني هم مش ضد النقد

بالعكس بتقبلوا النقد وبقدروا يستوعبوه بطريقه ايجابيه كثير

طالما انه النقد نفسه بيكون ايجابي او بناء، وهذا معناته انه هم بيفهموا وبيعرفوا

بانه الشخص اللي عم بينتقد اي شيء فيهم او بشغلهم عنده نوايا كويسه وحاب انه يشوفهم

بتقدموا، يعني هم اشخاص ايجابيين فبعتبروا بان النقد هو مجرد معلومات او ملاحظات

بتساعدهم انهم يتعلموا من نجاحات او اخفاقات الناس اللي

حواليهم ولهذا السبب هم بحبوا انهم يتفاعلوا ويحتكوا بغيرهم وبانهم يطرحوا

أسئلة. النقطه الثالثه هي بانه الناس الناجحين بفكروا خارج الصندوق وهذا معناته

انهم هم ما بتقبلوا الامور زي ما هي لازم يفهموا ويعرفوا ليش كل شيء بينعمل بطريقه

معينه فاذا كان منطقي بالنسبه لهم ممكن يتبنوا منهج معين، أما اذا ما كان منطقي

راح يحاولوا يدوروا على منهج جديد يساعدهم بانهم يتعاملوا مع مشكله معينه وكمان حتى

لو في كثير ناس بقولولهم بانه الاشيء مش ممكن

انجازه -اذا كانوا هم نفسهم مقتنعين فيه رح يضلوا

يحاولوا. التفكير خارج الصندوق كمان ممكن نحكي عنه تفكير جانبي وهو مصطلح

اوجده عالم النفس ادوارد ديبونو وهذا المصطلح معناته انه احنا

احيانا لازم نبتعد عن طريقه التفكير التقليديه ونحاول ندور على نواحي جديده

لفكره او مشكله معينه. الناس الناجحين ما بظلهم مربّطين او مقيّدين بطريقه تفكير

معينه. بقدروا الافكار الجديده وعندهم استعداد بانهم يجربوها. اما بالنسبه للسر

الرابع للناس الناجحين فهي بانهم ما بخافوا من الفشل وانهم يتعلموا من

اخطائهم الناس اللي كثير بيكونوا مركزين على النجاح بكل شيء من اول مره ممكن

تفوتهم فرص للتعلم من اخطائهم، طبعا هذا مش معناته بانه لازم نحاول نفشل لكن لازم

نحاول نجرب شغلات جديده حتى لو ما كنا متأكدين من النتيجه او كنا خايفين انه

نفشل وهذا معناته لازم نغادر نطاق الراحه اللي هو موضوع انا حكيت عنه في حلقه ثانيه-

باسم مغادره نطاق الراحه. اذا ما جربنا شغلات جديده فهذا معناته انه رح نضل في

نطاق الراحه لانه احنا خايفين كثير من الفشل. معظم الشغلات الجديده بتتطلب منا

،شوية شجاعه وطالما انه اخذنا اول خطوه الخطوات اللي بعدها مش حتكون سيئه مثل ما

احنا تصورنا وكمان اذا جربنا اشي جديد وما زبط

معانا، فكرة انه احنا جرّبنا مسار معين ممكن يؤدي لفكره جديده او مسار جديد ما كنا

مفكرين فيه من قبل. السر الخامس هو بانه الناس

الناجحين عندهم وعي عالي لنقاط القوه فيهم ومواهبهم. الناس اللي بفتقد للثقه بالنفس

ممكن يكون عندهم مواهب مميزه بس بيفشلوا بانه يتعرفوا عليها او انهم

يقدروها، بينما الاشخاص الناجحين غالبا بيكون عندهم ثقه عاليه وبيعرفوا وين نقاط القوه

عندهم واذا عندهم موهبه معينه. على الرغم بانه غيرهم ممكن يكون

عندهم مهارات او مواهب اكثر منهم، الشخص الناجح بستغل هاي الموهبه وبستعملها حتى انه

يتقدم في الحياه. والناس الناجحين كمان بكونوا على وعي بنقاط الضعف اللي عندهم

لكن بقرروا انه ما يخلوها عائق بحياتهم ويعني بيدوروا على مجالات ممكن نقاط الضعف

هاي ما تكون واضحه او ما يكون الها أهميه وبياخدوا خطوات محدده حتى انهم يتحسنوا

بهاي المجالات. الموهبه بتكون ضايعه اذا ما قدرناها او اذا قررنا انه نحطها على الرف

لانه احنا ما عندنا فكره كيف ممكن نستعملها

لصالحنا. النقطه السادسه هي بانه الناس الناجحين ما بخافوا يتركوا نطاق الراحه او

بانهم يغلطوا، فبالتالي عندهم جاهزية بانهم ياخدوا مخاطرات مدروسه. معظم الناس

بخافوا من المخاطره لانهم بخافوا من النتائج السلبيه،مثلا بانهم يخسروا فلوس

انه يصفّوا بوظيفه ما بحبوها او بكل بساطه انهم يفشلوا. الناس الناجحين ما بخافوا من

المخاطره لكن أكيد ما بروحوا بيقفزوا بمشاريع من غير ما يعرفوا ايش الايجابيات

والسلبيات اول اشي بيدرسوا الموضوع وبحلّلوا جميع جوانبه

وبستفيدوا من رأي الخبراء ومن الاغلاط اللي ارتكبوها غيرهم من الناس. بعض الناس اللي

ناجحين بكونوا فشلوا اكثر من مرة وهم بحاولوا انهم يحققوا هدف معين. الفرق بينهم

وبين الناس التانيين هو بانهم بتعلموا من اخطائهم. بيدوروا على طريقه افضل انهم

يحققوا الاشي وبعدين برجعوا بحاولوا كمان مرة. النقطه السابعه من اسرار النجاح هو

بانه الاشخاص الناجحين ما بيلوموا غيرهم وبتحملوا المسؤوليه عن حياتهم. في كثير منا

قضينا حياتنا واحنا بنلوم غيرنا او بنلوم القدر على حياتنا الحاليه او الاشي اللي

احنا ما قدرنا نوصله بحياتنا. في كثير ناس بظلهم يفكروا بتجاربهم السلبيه بالماضي مثل

طفوله سيئه او أهل ما عمرهم شجعوهم وبياخدوها كعذر انهم ما يتقدموا في الحياه

هو صحيح بانه الماضي بأثر على شخصيتنا وطبيعتنا لحد ما لكن بنفس الوقت احنا

بمرحله ما لازم نترك الماضي ورانا وناخذ قرار واعي بانه نحسّن حياتنا للافضل بغض

النظر ايش الاشي اللي ممكن قاعد بجرنا لورا. الناس

الناجحين مش اشخاص عمرهم ما خاضوا تجارب سيئه او صعبه هم اشخاص قرروا بانهم ما

يلوموا غيرهم وانهم يتحملوا المسؤوليه عن حياتهم. بالحقيقه معظمنا بنواجه صعوبات

بحياتنا وحتى لو في ناس ببين كأنهم عندهم حياه مثاليه .على الاغلب بكونوا هم كمان

واجهوا صعوبات في حياتهم. انه نتقدم للامام ونترك التجارب السلبيه ورانا اشي اساسي

للبقاء وهو مفتاح الحياه السعيده. النقطه الثامنه هي بانه الاشخاص الناجحين بآمنوا

بانفسهم كثير. مثل ما ذكرت قبل، الناس الناجحين عندهم ثقه عاليه بانفسهم ما

بخلوا المشاكل تعيقهم او تشدهم لورا بظلهم يدوروا على

افضل الحلول لهاي المشاكل، في كل مره تمكنوا من حل مشكله هذا بزيد ايمانهم بقدراتهم

بزيد ايمانهم بانفسهم وبيكونوا جاهزين ومستعدين انهم يتقدموا للامام على الرغم

من الصعوبات. النقطه التاسعه هي بانه الاشخاص

الناجحين هم مخلوقات اجتماعيه من ناحيه انهم بيكونوا فاهمين

اهميه العلاقات بشكل جيد. بحاولوا انهم يكَونوا شبكات من العلاقات قد ما بيقدروا

وانهم يقابلوا ناس من جميع مجالات الحياه لانهم مدركين انه مستحيل الواحد يعرف كل

اشي او يقدر يحقق كل اشي لوحده فاذا انتو حابين تكونوا ناجحين ،لازم يكون الكم ظهور

واضح وهذا معناته انه تكونوا موجودين بالمكان

المناسب بالوقت المناسب. بغض النظر عن مستوى تعليمكم غياب العلاقات هاي مش رح

يحققلكم اكثر من نجاح متوسط في معظم الاوقات. وهيك بنكون وصلنا نهايه هاي الحلقه

من تعلم العربيه براحتك .اذا انبسطتوا بالاستماع ما تنسوا تشتركوا بهذا

البودكاست .انبسطت كثير بوجودكم معي ويا ريت لو تكونوا معي بالحلقات الجايه. انا عايدة من

تعلم العربيه براحتك- الى اللقاء