مرحبا بكم في حلقة جديدة من تعلم العربية براحتك. أنا عايدة وبهاي السلسلة رح أحكي عن موضوع مختلف في كل مرة بحيث يتناسب الموضوع مع هذا المستوى وبسرعة أبطأ من العادي حتى أسهل عليكم فهم المحتوى. هذا البودكاست مش للمبتدئين.

 

اليوم رح أحكي عن أكتر المخاوف الشائعة عند الناس. وأنا بقصد مش الفوبيات أو المخاوف اللي عادة بنسمع عنها مثل الخوف من المرتفعات أو من العناكب. أنا بقصد المخاوف اللي معظمنا بنتشارك فيها واللي ممكن تعيقنا وتمنعنا من أنه نعيش حياة سعيدة ومريحة.

 

أول هاي المخاوف هو الخوف من الفشل. في كتير منا عنا أفكار كويسة لكن بنميل لأنه نبعد هاي الأفكار ونقنع نفسنا بأنه ما عنا وقت لهاي الأفكار أو بأنه أفكارنا مش مفيدة، أو اللي أسوأ من هيك بأنه ما رح نقدر نطبق أفكارنا. الخوف من الفشل ممكن يأثر أو يكون مرتبط بدراستنا، وظائفنا، أو حتى علاقاتنا.

 

مخاوفنا ممكن تمنعنا من أنه ندور على وظيفة أفضل،(أو) نحصل على شهادة علمية أعلى مثلا. فبدل ما نفشل، في كتير منا بنفضل بأنه نتفادى نجرب شغلات جديدة ممكن تكون مجزية النا على المدى البعيد. في فكرة خاطئة شائعة بأنه الفشل إشي معيب.

 

بنخاف أنه الناس اللي حوالينا رح يحكموا علينا بشكل سلبي إذا فشلنا. مع أنه الخوف من الفشل ممكن يؤدي لنتيجتين سلبيتين. الأولى هي بأنه ممكن نتفادى نجرب شغلات جديدة أو نختبر أفكار جديدة ممكن تؤدي لنجاحنا بشكل كبير.

 

والتانية هي بأنه ممكن إحنا تفوتنا دروس مفيدة كتير إلنا، الفشل بعلمنا إياها، اللي كان ممكن تؤدي لنجاحنا وسعادتنا. وفي خوف تاني شائع وهو الخوف من إنه إشي سيئ يحصل معانا. على الأغلب عنا هذا الخوف لأنه فعليا إحنا بنشوف شغلات سيئة بتصير حوالينا.

 

بنشوف بأنه إشي سيئ حصل مع غيرنا وبنقلق بأنه هذا الإشي ممكن كمان يصير معانا. بس من المهم إنه نتذكر أو ندرك بأنه إذا قضينا حياتنا نقلق على شغلات ممكن تمشي بطريقة سيئة ما رح نعيش باللحظة الحالية. اللي ممكن يساعدنا مع هذا الخوف هو بأنه نتذكر إنه عادة بنلاقي (إحنا) حلول لمشاكلنا.

 

إذا بلشنا نتطلع على المشاكل على إنها تحديات بدل ما إنها تكون إشي بيجرنا لورا ، شوي شوي حنبلش نوقف قلقنا، حنبطل نقلق بشكل مبالغ. وكمان لازم نذكر أنفسنا بأنه في كتير شغلات كويسة بتصير معانا في حياتنا فإذا بلشنا ندرك ونكون واعيين لكل الشغلات الإيجابية اللي ربنا أنعم علينا فيها بحياتنا، بنبطل نركز على الأمور السلبية أو السيئة اللي ممكن تصير معانا.

وفي خوف ثالث ممكن نواجهه، اللي هو الخوف من الوحدة. الدراسات بينت بأنه الوحدة ممكن تكون مضرة لصحتنا بنفس حجم الضرر اللي ممكن يسببه الدخان على صحتنا. الوحدة بتخلينا نفكر بمواقف معينة بحياتنا بشكل مبالغ فيه. في ناس مثلا ممكن يتفادوا أنهم يطلعوا من بيوت أهلهم ويصيروا مستقلين لأنهم بخافوا من الوحدة. وفي غيرهم ممكن يضلوا بعلاقات مش صحية لنفس السبب.

في كتير ناس بكونوا موسوسين باستخدام السوشال ميديا لأنهم بحسوا أنهم دائما مرتبطين بالعالم اللي حواليهم بس بينسوا بأنه مهم (بأنه) يكون عندهم علاقات على أرض الواقع وتواصل مع الأشخاص من حولهم.

والخوف الرابع اللي بدي أحكي عنه هو الخوف من التغيير. إحنا بنعيش بعالم بتغير بسرعة بنضطر فيه بأنه نتأقلم مع مواقف كتيرة جديدة ومختلفة وممكن بنشوف بأنه إحنا مضطرين نغادر بلادنا حتى ندور على فرص عمل أفضل أو نترك علاقة غير صحية.

 أحيانا التغيير ممكن يكون مرتبط بعواطف جيّاشة- عواطف قوية -ولما يكون في إمكانية، بجوز نحاول نتفادى هذا التغيير بشكل كامل، فلازم نتذكر -من المهم أنه نتذكر- بأنه التغيير مش بالضرورة يكون إشي سيء، وبأنه بالعكس ممكن يضيف طعم أو نكهة جديدة ونوع من أنواع الإثارة في حياتنا. في كتير من الأحيان ممكن نتفاجأ بأنه لقينا نوع جديد من السعادة أجا مع التغيير اللي إحنا عملناه. وإذا جربنا شغلات جديدة فهذا الإشي بخلي تجاربنا بالحياة غنية وبيعطينا وجهات نظر جديدة عن مواضيع مختلفة.

 

 وهيك بنكون وصلنا نهاية هاي الحلقة من تعلم العربية براحتك. إذا حبيتوا هاي الحلقة لا تنسوا أنكم تشتركوا بهذا البودكاست وكمان تذكروا بأنه الاستماع لنفس الحلقة أكتر من مرة بساعدكم تتذكروا المعاني الجديدة أو المفردات الجديدة اللي تعلمتوها.

 بشكركم على استماعكم- ياريت لو تكونوا معي بالحلقات الجاية. أنا عايدة من تعلم العربية براحتك إلى اللقاء!

 

(Transcribed by TurboScribe.ai)