مرحبا بكم في حلقتنا لليوم من تعلّم العربية براحتك. أنا اسمي عايدة، وأنا هون حتى أساعدكم اتحسنوا مهاراتكم باللغة العربية العامية بالمستوى المتوسط. إذا كنتو مبتدئين، بنصحكم (أنكم) تدوروا على محتوى للاستماع بيعتمد على اللغتين العربية والإنجليزية بنفس الوقت حتى يسهل عليكم فهم المحتوى.

 

بهذا البودكاست رح تستمعولي وأنا بحكي عن مواضيع مختلفة مرتبطة بتطوير الذات، اللغات، الثقافة وغيرها من المواضيع. اليوم رح أحكي عن الفوبيات. الفوبيا هي عبارة عن خوف تجاه شغلة مش من المرجح أنها تسببلنا أذى.

 

ومصدر هاي الكلمة هي الكلمة اليونانية فوبوس اللي بتعني الخوف أو الرعب. لما يكون حدا عنده فوبيا بحس بالخوف الشديد تجاه شغلة أو موقف معين. الفوبيات بتختلف عن المخاوف العادية لأنها بتسبب حالة انزعاج شديدة.

 

احتمال تأثر على حياة الشخص بالبيت، بالعمل أو بالمدرسة. الناس الي عندهم فوبيا بتفادوا الموقف أو الشغلة الي بتسببلهم الفوبيا أو بتحمّلوها مع درجة عالية من الخوف أو القلق. الفوبيات إلها أشكال وأحجام مختلفة.

 

ولأنه في عدد غير نهائي من الشغلات والمواقف، القائمة الي إلها دخل بالفوبيات المحددة طويلة لحد ما. وهلأ رح أحكي عن أنواع الفوبيات. في فوبيات محددة بتتصنف تحت خمس تصنيفات رئيسية عامة:

 

الخوف من بعض الحيوانات، مثل العناكب، الكلاب والحشرات. الخوف من البيئة الطبيعية حولنا، مثل المرتفعات، الرعد والعتمة. الخوف المتعلق بالدم أو الجروح أو أي حالة طبية مثل الإبر أو الوقعات مثلا.

 

الخوف من مواقف محددة، مثل الطيران أو الركوب في مصعد أو السواقة. وبعدين في أنواع متنوعة من الفوبيات بتتعلق مثلا بالشردقة أو الأصوات العالية أو الغرق على سبيل المثال. هاي الفوبيات ممكن تختلف بناء على التجارب الثقافية، الجنس والعمر.

 

وهلأ بدي أذكر بعض الفوبيات الشائعة، وبعدين رح أنتقل لغيرها اللي ممكن ما عمركم سمعتوا عنها. من الفوبيات الشائعة: الخوف من الطيران، الخوف من الحيايا أو الأفاعي، الخوف من العناكب، الخوف من المرتفعات، الخوف الاجتماعي، الخوف من الأوساخ والجراثيم، الخوف من الرعد والبرق. ومن الفوبيات اللي مش شائعة، رح أذكر الخوف من أجهزة الكمبيوتر أو التكنولوجيا، الخوف من الخضروات، الخوف من الأطفال، الخوف من الزواج، من الأقدام، الخوف من النوم، والخوف من الكلمات الطويلة.

 

الخوف الأخير (من الكلمات الطويلة) عادة بتكون موجودة بالأطفال، وبسببو ضحك بعض الأطفال عليهم وهم بيقرؤوا أو يحاولوا أن هم يلفظوا الكلمات الطويلة. في كمان عنا الخوف من الجبنة. وكمان بما أنه هذا الخوف أو الفوبيا جديد، لازم أذكره، اللي هو الخوف أني أنا أكون موجود من غير التليفون النقال أو الجوال تبعي.

 

وهذا اسمه باللغة الإنجليزية نوموفوبيا. الناس اللي عندهم نوموفوبيا، اللي هو ممكن كمان نطلق عليه اسم الإدمان على الجوال، بعانوا من القلق أو حتى من نوبات الهلع بعد ما يضيعوا تلفوناتهم. وبصير معهم نوع من أنواع الوسواس بأنهم دائماً بتأكدوا من وجود التليفون جنبهم أثناء النهار.

 

هاي الفوبيات بتأدي لارتفاع نسبة القلق أو الخوف، وممكن يأدي لبعض الأعراض مثل الدوخة، اللعيان، وضيق النفس. يمكن كثير منكم يتساءلوا عن سبب ظهور هاي الفوبيات. بناءً على بحثي في هذا الموضوع، مش مبين أنه فيه سبب واحد محدد للفوبيات.

 

فيه عوامل متنوعة ممكن تساهم بظهور الفوبيا. لكن كثير من الأحيان ما بكون فيه سبب واضح شو اللي بلّش هاي الفوبيا. أمثلة على الأمور اللي ممكن تسبب الفوبيا هي أحداث أو صدمات بالماضي.

 

يعني ممكن في مواقف بالماضي كان الها تأثير دائم أو طويل الأمد علينا. على سبيل المثال، إذا مثلاً كنتوا راكبين طيارة بعمر صغير وتعرّضت هاي الطيارة لاضطرابات كثيرة، ممكن يطوروا فوبيا من الطيران. أو إذا مثلاً فيه كلب سببلكوا جرح قبل سنين كثيرة، ممكن اتطوروا رهاب من الكلاب.

 

سبب تاني، استجابات تعلمناها وإحنا بعمر صغير. ممكن الفوبيا اللي عندك اتطور من عوامل موجودة ببيئتك كطفل. على سبيل المثال، يمكن عندك أهل أو مربيين عندهم قلق شديد.

 

هذا ممكن يأثر على طريقة استجابتك مع القلق بوقت متأخر من حياتك. وممكن اتطور حتى نفس الفوبيا اللي موجود عند الأب أو الأم. فإذا هما عندهم ردة فعل شديدة تجاه إشي بخافوا منه، هذا ممكن يأثر عليك وتحس بنفس الإحساس.

 

كمان سبب لظهور الفوبيا، ممكن يصير معك ردة فعل قوية أو حتى نوبة هلع كاستجابة لموقف أو إشي معين. وهذا الموقف بسببلك إحراج، وخاصة إذا الناس اللي حواليك بتكون استجابتهم لهذا التصرف عنيفة أو قوية. فبالتالي ممكن يصير معك قلق شديد لما تفكر بأن هذا الموقف ممكن يتكرر.

 

الفوبيا ممكن كمان يسببه إرهاق وإجهاد بستمروا لفترة طويلة من الزمن. الإجهاد بسبّب مشاعر من القلق والاكتئاب، وعلى المدى البعيد هذا ممكن يتطور ويصير فوبيا.

 وآخر مسبب للفوبيا هي العوامل الجينية.الأبحاث بتحكي بأن بعض الناس معرضين أكتر إنهم يطوروا فوبيا من غيرهم من الناس. فإذا أنتو بتعانوا من أي نوع من الفوبيا، ممكن تنبسطوا إذا عرفتوا أنه في أكتر من طريقة للعلاج، طبعا حسب نوع الفوبيا اللي موجودة عندكم. لكن ما في طريقة علاج واحدة مضمونة حتى إنها اتعالج كل أنواع الفوبيات.

 

وفي بعض الحالات ممكن ينصحوا المعالجين أو الدكاترة باستعمال أو باللجوء لأكتر من نوع من العلاج. رح أحكي بشكل مختصر عن أنواع العلاج للفوبيات. في عندنا أول إشي العلاج بالتعرض وهذا عبارة عن علاج نفسي اتطور عشان يساعد الناس إنهم يواجهوا مخاوفهم.

 

فلما يكونوا خايفين من شغلة معينة، همه بتفادوا الإشي اللي بسببلهم الخوف أو المواقف اللي بتسبب هذا الخوف. ففي مثل هاي المواقف، الطبيب النفسي أو المعالج ممكن ينصح ببرنامج بتعلق بالعلاج بالتعرض حتى يكسر نمط الخوف والتفادي.

 العلاج الثاني هو العلاج السلوكي المعرفي. وهذا نوع من أنواع الاستشارة النفسية اللي بتساعدكم إنكم تديروا مشاكلكم أو تتحكموا فيها عن طريق تغيير طريقة تفكيركم وتصرفاتكم. جزء من عملية العلاج السلوكي المعرفي، اللي عادة بستعملوها حتى يعالجوا فوبيا بسيطة، بتتعلق بالتعرض المتدرج للإشي اللي أنتوا بتخافوا منه حتى تخفف درجة القلق اللي بتصير معاكم. على سبيل المثال، إذا بتخافوا من الأفاعي، المعالج يمكن يبلش ينصحكم أو يطلب منكم إنكم تقرأوا عن الأفاعي.

 

بعدين ممكن يفرجوكم صورة عن أفعى. ممكن بعد هيك ياخدوكم على حديقة حيوانات حتى تتفرجوا على أفاعي على أرض الواقع. الطريقة الثالثة بالعلاج بتشمل العلاج بالاسترخاء وهذا معناته تمارين التنفس العميق أو تمرين اليوغا اللي بتساعد بعلاج الفوبيات.

 

اللجوء لأساليب الاسترخاء هاي ممكن تساعدكم بالتخلص من الإجهاد والتخفيف من أعراض الفوبيا الجسدية. وفي عندنا كمان علاج بالأدوية. بالحالات الصعبة أحياناً ممكن اللجوء للأدوية لكن مش دائماً بكون هذا علاج مناسب للفوبيات المحددة.

 

وعادةً ما بلجؤولها أو ما بنصحوا فيها لعلاج الفوبيات لأنه العلاج السلوكي المعرفي عادةً بكون فعال وما إلو آثار جانبية. لكن الأدوية يمكن يوصفوها لعلاج آثار الفوبيات مثل القلق. ما رح أدخل بأي تفاصيل تتعلق بالأدوية لأنه أنا مش طبيبة.

 

وحابة أذكركم بسرعة بأنه هذا البودكاست هدفه هو تحسين فهمكم للعربية العامية بالمستوى المتوسط. بشكركم كتير لاستماعكم. بتمنى تكونوا حبيتوا هاي الحلقة ويا ريت لو تكونوا معي بالحلقات الجاية وتشتركوا بهذا البودكاست.

 

شكرا كتير وإلى اللقاء.

 

(Transcribed by TurboScribe.ai)