مرحبا، أنا اسمي عايدة وقررت إني أعمل هذا البودكاست حتى أساعدكم تستمعوا لنصوص أصلية باللغة العربية العامية. فإذا كنتوا بالمستوى قبل المتوسط، هذا هو المكان الصح لإكم حتى تحسنوا مهارة الاستماع والمحادثة بالعربية العامية. بهاي السلسلة، رح تستمعوا لموضوع مختلف في كل مرة.

 

والهدف إني أزودكم بالمفردات اللازمة بمجال واسع من المواضيع، مثل العيلة، الهوايات، الدراسة، السفر وغيرها من المواضيع. اليوم رح أحكي عن الهدايا. الأسئلة اللي رح أطرحها هي: هل الهدايا مهمة؟ هل الكل بحب يشتري هدايا؟ وأيش هو الإشي المهم اللي لازم نراعيه لما بنشتري هدية؟ الهدية واحدة من الشغلات اللي بتخلينا مبسوطين أو بتجبلنا السعادة.

 

والهدية تعبير عن الحب والتقدير. إذا بنحب شخص، بنحب نصرف شوية فلوس حتى نجبلهم هدية، بنكون مقتنعين أو مفكرين بأنها رح تعجبهم. والشخص اللي بيستلم الهدية بحس بأنه هو محبوب وأنه الشخص اللي جابله الهدية بقدره.

 

الهدايا مش ضروري تكلف مبلغ كبير من الفلوس. لكن لازم تعكس بأنه اللي بيشتري الهدية ببذل شوية جهد على الأقل حتى يفكر إيش الإشي اللي ممكن يبسط الطرف الثاني. الناس بيشتروا هدايا لمناسبات عادية مثل أعياد الميلاد، الزواج والتخريج.

 

هاي كلها مناسبات معروفة عالمياً. لكن الهدية اللي شكله الناس بقدروها أكتر هي الهدية اللي ما بنتوقعها. الهدية المش متوقعة يمكن تكون أحلى هدية لأنه بتكون إنت متأكد بأنه الشخص اللي أعطاك الهدية ما كان مضطر إنه يعمل هيك.

 

في ناس بحبوا كتير يشتروا هدايا لأنه من ناحية بحبوا يطلعوا يشتروا أغراض بشكل عام -يتسوقوا- ومن ناحية تانية همه بكونوا أشخاص عندهم إيثار، يعني بنبسطوا لما يبسطوا غيرهم. وفي ناس ما بحبوا يشتروا هدايا، ممكن همه أصلاً ما بحبوا يطلعوا يتسوقوا أو بجوز بتغلبوا حتى يشتروا هدية. الهدايا مهمة لأنها صارت تقليد أو عرف بمعظم المجتمعات.

 

وكمان لأنه معظم الناس صاروا يتوقعوا إنهم ياخدوا هدية على الأقل بالمناسبات الخاصة. عدم استلام هدية ممكن يسبب خيبة أمل وحزن. طبعاً أكيد في هدايا بتكون كويسة وغيرها ممكن نوصفها بأنها هدايا سيئة.

 

يمكن أسوأ أنواع الهدايا هي اللي بكون واضح عليها إنها رخيصة كتير أو هدايا بتكون عكس الإشي اللي بحب يستلمه الطرف الثاني. وهلأ خلوني أعطيكم مثال إيش ممكن الواحد يحكي لما بده يجاوب على أسئلة مرتبطة بالهدايا:

 

 (أنا بحب أستلم هدايا. الهدايا بتخليني أحس بأنه الناس اللي حوالي بحبوني وبقدروني. بس الهدايا مش شرط إنها تكون غالية. إذا قدرت أدفع شوي أكتر بحب إني أعمل هيك حتى أجيب هدية مميزة للشخص اللي بحبه.

 

ويمكن أفضل الهدايا هي اللي بيهدوها الناس اللي عندهم ذكاء عاطفي. لأنهم بديروا بالهم كتير على التفاصيل الصغيرة اللي بتسعد غيرهم. هدول الناس بتذكروا لونك المفضل. وبديروا بالهم لما يسمعوك بتحكي جمل بسيطة مثل: يا ريت لو عندي -أو: لما أوفر شوية فلوس رح أشتري.... أما بالنسبة للأطفال فالهدايا الزيادة عن حدها ممكن تكون مضرة. لأن الطفل يمكن يتعود إنه ياخد كل إشي بدو اياه.

 

وكمان الهدايا مش لازم تكون بديل عن العاطفة. الأطفال كمان بيحتاجوا الحب والاهتمام من أهلهم ومش بس هدايا. أحياناً شراء الهدايا ممكن يكون مزعج لما يبطل عندك أفكار شو بدك تشتري.

 

بصير أصعب وأصعب إنك تطلع بأفكار جديدة لأعياد الميلاد بكل سنة مثلاً. وبهاي الحالة ممكن الإنترنت يكون مفيد للناس اللي ما عندهم أفكار جديدة أو ما بحبوا يروحوا يتسوقوا. سهل الأيام هاي إنه يشتري أونلاين أو يبحث عن أفكار جديدة لمناسبات محددة.

 

بساعد كتير إنك تشتري هدايا أونلاين لما يكون نمط حياتك مشغول كتير ومش دائماً بتلاقي الوقت إنك تطلع وتشتري هدية.

 

وهلأ حاولوا إنكم تجاوبوا على السؤال التالي بالعربية العامية. بتحبوا تشتروا هدايا؟ شو هو الإشي اللي بعجبكم وإيش الإشي اللي ما بعجبكم بهذا الموضوع؟ وهذا اللي بدي أحكيه اليوم بالنسبة لموضوع الهدايا.

 

بتمنى إنكم تكونوا لقيتوا هاي الحلقة مفيدة. وإذا حبيتوها، اتذكروا بإنه الاستماع لنفس الحلقة أكتر من مرة مفيد كتير حتى تتذكروا المفردات الجديدة اللي تعلمتوها. انبسطت كتير بوجودكم معي. واتذكروا إنكم تتركولي لايك إذا حبيتوا هاي الحلقة وإنكم تشتركوا بهذا البودكاست.

 

أنا عايدة من تعلم العربية براحتك. إلى اللقاء!

 

(Transcribed by TurboScribe.ai)