مرحبا بكم في حلقة جديدة من تعلم العربية براحتك للمستوى قبل المتوسط. في هاي السلسلة رح أحكي عن موضوع مختلف في كل مرة بحيث تتناسب المواضيع مع هذا المستوى. وطبعا رح أحكي بسرعة أبطأ من العادي حتى أسهل عليكم فهم المحتوى.

 

هدفي هو إني أزودكم بالمفردات اللازمة في مجال واسع من المواضيع. اليوم رح أحكي عن الناس المفضلين لإلنا في حياتنا واللي بنعتبرهم قدوة لإلنا. معظمنا بكون عندنا قدوة واحنا عم نكبر.

 

وهدول الناس بكونوا أشخاص إحنا بنعجب فيهم وبنطمح أنه نكون زيهم. ممكن أنه إحنا بنعجب بهدول الأشخاص لأنهم قدروا يتوصلوا لأهداف معظم الناس ممكن ما قدروا يحققوها أو ممكن همه قدروا ينجحوا بشكل كبير بالمجال اللي همه فيه. ومن ناحية تانية ممكن نكون معجبين فيهم بسبب طيبتهم والصفات الكويسة اللي موجودة فيهم.

 

الشخص اللي بنعتبره قدوة ممكن يكون شخص مشهور أو ممكن القدوة تكون عبارة عن أشخاص عاديين بنشوفهم باستمرار. وإحنا بناخد قدوة لأنه بنطمح أنه نكون أشخاص ناجحين وكويسين. وجود قدوة بحياتنا بساعدنا أنه نظل إيجابيين ونتغلب على مخاوفنا.

 

بساعدنا انه نظل بالمسار اللي إحنا ماشيين فيه لما بنواجه صعوبات. لأنه لما نشوف شخص عم بعيش حلمه أو أحلامه وعم بقدر يحقق أهدافه، هذا الإشي بحفزنا أنه نعمل زيهم. لما نراقب شخص مبسوط وناجح هذا الإشي بذكرنا بأنه إحنا كمان ممكن نكون مبسوطين وناجحين.

 

لما نكبر شوي بالعمر القدوة غالباً بتتغير عنا. كمراهقين ممكن القدوة يكون شخص بلعب فوتبول، ممكن يكون مغني مشهور. ولما بنبلغ الشخص اللي بنعتبره قدوة عادةً بكون شخص بنعرفه بشكل شخصي.

 

واحتمال كبير كمان أنه يكون فرد من أفراد العائلة. وبنفس الوقت ممكن القدوة يكون شخص ناشط بحاول أنه يحل بعض المشاكل اللي بتأثر على ناس كتير. مثل الأشخاص اللي بيدعوا لحماية البيئة أو المساواة في الحقوق لجميع فئات المجتمع.

 

القدوة ممكن يكون بلعب دور كبير بكيفية نجاح الإنسان وتحقيقه لأهدافه. عادةً بنختار قدوة بتشارك معنا بنفس القيم ونفس الحس بالصح أو الخطأ.

 

وهلأ خليني أعطيكم مثالين شو ممكن الواحد يحكي لما بده يجاوب على أسئلة مرتبطة بموضوع القدوة.

 

الشخص الأول ممكن يحكي:

(أنا ما عنديش قدوة. في كتير ناس ممكن أكون معجب فيهم بسبب الأهداف اللي حققوها بس أنا ما عندي نية بإني أقلدهم أو إني أتصرف نفس تصرفاتهم. طبعاً كلنا بنحب إنه نكون ناجحين ونحقق أهدافنا بس أنا بتصوري كل واحد منا لازم يحاول يلاقي طريقه بنفسه. ومش شرط إني أسلك نفس المسار اللي سلكه غيري. وبشكل خاص أنا معجب بالناس اللي بيقضوا سنين كتيرة من حياتهم وهم بحاولوا يحسنوا حياة الأجيال القادمة. في كتير ناس بيبذلوا جهد كبير لهذا الهدف، فبالتالي صعب كتير إني أحدد شخص واحد بس إنه يكون قدوة إلي).

 

وشخص تاني ممكن يحكي:

( بالنسبة لهذا الموضوع لما كنت صغير قدوتي كان أخوي الكبير. كان ذكي، كان رياضي وعنده صحاب كتير. كنت بدي أكون زيه. كمان كتير كان يدير باله علي وكان يدافع عني لما كنت أوقع بمشاكل. كنت عارف بأنه دائماً رح أكون بأمان بوجوده. بس لما كبرنا صار عنه اهتمامات مختلفة تماماً وأول ما أخد شهادته الجامعية ترك البلاد حتى يدور على فرص عمل أفضل. حالياً ما عندي قدوة بس أنا بعتبر بأنه وجود قدوة بحياتنا بلهمنا إنه نكون نسخة أفضل من أنفسنا وإنه ما نيأس بسرعة.

 

وهيك بنكون وصلنا نهاية هاي الحلقة. بتمنى إنكم تكونوا لقيتوها مفيدة وإذا حبيتوها، اتذكروا بأنه الاستماع لنفس الحلقة أكتر من مرة مفيد كتير بأنه تتذكروا المفردات الجديدة اللي تعلمتوها. بشكركم كتير لوجودكم معي ويا ريت لو تتركولي لايك إذا حبيتو هاي الحلقة وتكونوا معي بالحلقات الجاية.

 

 أنا عايدة من تعلم العربية براحتك. إلى اللقاء!

 

(Transcribed by TurboScribe.ai)