مرحبا، أنا عايدة مع حلقة جديدة من تعلم العربية براحتك للمستوى قبل المتوسط. في هاي السلسلة بحكي عن موضوع مختلف كل مرة بحيث إنه الموضوع يتناسب مع هذا المستوى، وطبعاً بسرعة أبطأ من العادي حتى أسهّل عليكم فهم المحتوى. اليوم رح أحكي عن الأسباب اللي بتخلي الناس يتركوا موطنهم الأصلي.

 

في كتير ناس بتركوا بلادهم الأيام هاي. بعض الأسباب اللي بتخليهم يغادروا بلادهم إيجابية وبعدها سلبية. الناس اللي بكونوا مضطرين يغادروا بلادهم بسبب الحروب، بنطلق عليهم اسم لاجئين.

 

ما بقدروا يضلوا ببلادهم لأنه الظروف بتكون خطرة، وممكن (همه) بكونوا بغامروا أو بخاطروا بحياتهم. هدول اللاجئين أحياناً بتقبّلوهم في الدول المستقبلة. بقدمولهم مساعدات وممكن حتى يسمحولهم إنه يضلوا.

 

حالياً في حوالي 89 مليون لاجئ بالعالم. كمان سبب سلبي بيجبر الناس إنهم يتركوا بلادهم هو الكوارث الطبيعية. بسبب الفيضانات أو الزلازل، ممكن الناس يخسروا بيوتهم ويقرروا إنهم يرحلوا على بلد تانية بحسوا فيها بالأمان أكتر وممكن يحاولوا يبلشوا فيها حياة جديدة.

 

وغيرهم من الناس بهاجروا لأنهم بدوروا على حرية سياسية أكبر. بحسوا بغياب حرية التعبير عن الرأي في بلادهم، فبهاجروا لدول تانية معروف عنها بأنها بتتمتع بحرية سياسية أكبر. وفي عدد كبير من الناس بقرّروا إنه يتركوا بلادهم حتى يدوروا على فرص أفضل.

 

معظمهم بيجوا من الدول النامية وبكونوا حابين يدرسوا أو يشتغلوا بالدول المتقدمة. بالعالم العربي، إنك تاخد شهادة أكاديمية من العالم الغربي يعتبر مكسب كبير. وكمان الجامعات الحكومية بتتطلب معدلات عالية في بعض مجالات الدراسة مثل الطب والصيدلة.

 

والجامعات الخاصة بتكون مكلفة كتير. مش الكل بقدر يدفع تكاليف هاي الجامعات الخاصة. فبعض الطلاب بقرّروا بأنهم يدرسوا بالخارج لأنه مجال دراستهم مش متوفرة بتكون ببلادهم الأصلية.

 

ومن أهم أسباب الهجرة إنه ندور على فرص عمل أفضل. أحياناً ما بكون في وظائف كافية في مجال معين أو بكون الراتب قليل كتير. عشان هيك الخريجين بقرّروا بأنهم يهاجروا على بلد ثانية بكون فيها مجال تخصصهم مطلوب والراتب أفضل.

 

وهذا أحياناً معناته بأنه لازم يتعلموا لغة جديدة. في بعض الخريجين بيقعدوا سنة أو سنتين بتعلموا هاي اللغة الجديدة. ولما يوصلوا للبلاد الجديدة بكون صعب بالنسبة إلهم بالبداية إنهم يتأقلموا بالمجتمع الجديد. وكمان إنهم يقدروا يتفاعلوا أو يتواصلوا مع الناس المحليين بلغتهم، على الرغم من إنهم بكونوا توصلوا للمستوى المتوسط باللغة. بس مش بس اللغة هي اللي بتخلي المشوار هذا صعب. كمان العقلية ممكن تكون مختلفة والعادات والتقاليد.

 

بعد سنة أو سنتين معظم المهاجرين بكونوا تعودوا على أسلوب الحياة الجديد وبكونوا مبسوطين لأنهم بحسوا إنهم اتخذوا القرار الصح بهجرتهم على بلد جديدة. بقدروا المستوى المعيشي الأفضل واللي بيسمحلهم إنهم يعيشوا بأريحية أكبر من بلادهم.

 

وعدد أصغر بكتير بكونوا بدهم يسافروا لبلدان تانية عشان يتعرفوا على ثقافات جديدة وأنماط جديدة بالتفكير. انتشار السوشال ميديا أدى لارتفاع بأعداد مستخدمي اليوتيوب اللي توصلوا لنجاح كبير عن طريق سفرهم لبلدان جديدة، بسجلوا فيها تجاربهم. وبعض مستخدمي اليوتيوب هدول بضلهم يسافروا لعدة سنوات من غير ما يرجعوا لموطنهم الأصلي.

 

وهم بيعملوا هيك طواعية، بكونوا حابين يغادروا لأنه بيقدروا يكسبوا فلوس عن طريق برنامجهم على اليوتيوب وبنفس الوقت بتعلموا لغات جديدة وبكتسبوا معارف أوسع.

 

وهيك بنكون وصلنا لنهاية حلقتنا لليوم من تعلم العربية براحتك. بتمنى أنكم لقيتوا هاي الحلقة مفيدة وإذا حبيتوها، اتذكروا بأنه الاستماع لنفس الحلقة أكتر من مرة بساعدكم (أنكم) تتذكروا المفردات الجديدة اللي تعلمتوها.

 

انبسطت بوجودكم معي وياريت لو تكونوا معي بالحلقات الجاية وتشتركوا بهذا البودكاست. أنا عايدة من تعلم العربي براحتك. إلى اللقاء!

 

(Transcribed by TurboScribe.ai)